Агенцијата за патишта на Бугарија делумно виновна за несреќата од 2021 во која загинаа 45 македонски државјани

Агенцијата за патна инфраструктура на Бугарија (АПИ) има делумна вина за трагичната несреќа на автобусот на „Беса транс“ на автопатот Струма во 2021 година, во која загинаа 45 македонски државјани, пресуди Окружниот суд во Перник.

Според судот, АПИ е одговорна за 10% од настанатата штета и треба да ѝ се наложи на секој од тужителите да им плати по 20.000 лева како надомест за нематеријална штета. Исто така, се признаваат околностите дека за предметната делница не е донесен акт 16 за автопат и затоа има статус на експресен пат, бидејќи делницата беше пуштена за сообраќај во 2007 година во фаза на акт 15, се вели во судската одлука. Се наведува и дека возачот го возел автобусот со 106 километри на час, што е максималната брзина на делницата од 120 километри.

При проектирањето на експресниот пат не биле испочитувани геометриските карактеристики. Проектираниот попречен наклон на кривината одговара на брзина од 90 километри на час, но нема поставено патна ознака Б26/90 километри на потребните места за ограничување на брзината, додаваат од судот.

Несреќата на автопатот Струма се случи утрото на 23 ноември 2021 година, кај селото Боснек. Туристичкиот автобус во кој се наоѓаа 52 лица, удрил во заштитната ограда на патот, се запалил и целосно изгорел.

Автобусот, сопственост на компанијата „Беса транс“, се враќал од Истанбул кон Скопје. Истрагата за несреќата беше водена од Националната истражна служба. На 20 јануари 2022 година пред Окружниот суд Перник беше поткрената граѓанска постапка за обезбедување докази во врска со инцидентот.

Во август 2022 година роднините на настраданите поднеле барање за обесштетување од 750 илјади евра против АПИ и Бугарската асоцијација на осигурување возила. Тезата на адвокатите на роднините на жртвите е дека во моментот на несреќата имало голем број технички неисправности на коловозот, погрешни ознаки и знаци, неквалитетни заштитни огради и асфалт, што влијаело на несреќата.

Сопственикот на „Беса транс“ Беким Хаџиу доби казна затвор од само една година и осум месеци, бидејќи фалсификувал документи кои потоа ги користеле возачите.

Казнета беше и фирмата „Беса транс“ како правно лице со парична казна од 800.000 денари и доби забрана за добивање лиценца за патен превоз во рок од четири години од правосилноста на пресудата.

Извор: МЕТА