АНАЛИЗА: Капиталните расходи на „инфузија”, реализација од 40% за девет месеци

Само четири министерства за девет месец реализирале повеќе од 60 отсто од планираните капитални инвестиции. Трите новоформирани ресори – за спорт, за енергетика и за јавна администрација, иако имаат поголем износ на средства за капитални инвестиции, засега реализацијата е нула, пишува Порталб.мк. Според новите податоци од Министерството за финансии, највисок износ на потрошени средства за јавни инвестиции има Министерството за внатрешни работи (МВР).

Дел од ресорите со поголеми буџети испорачаа „лазечки“ проценти на капитални инвестиции

Од ресорите кои располагаат со поголеми буџети, Министерството за внатрешни работи за девет месеци реализирало 16,7 милиони евра или 83,02 отсто од предвидените капитални расходи. Министерството за економија и труд од предвидените скоро 347.000 евра потрошило 73,21 отсто, а Министерството за одбрана од 96,2 милиони евра реализирало 70,2 проценти. Министерството за земјоделство од годишниот буџет во износ од 5,9 милиони евра за капитални расходи, за девет месеци остварило 63,17 отсто. Сите останати ресори имаат реализација на капиталните расходи помала од 55 проценти.

Министерството за финансии – функции на држава (преку кое се вршат исплатите по различни основи) заклучно со третиот квартал реализирало 50,46 отсто од предвидените 173,1 милиони евра за капитални расходи, а околу половина од планираните средства потрошиле и Министерството за образование, кое од 33,9 милиони евра реализирало 50,97 проценти и Министерството за здравство, кое од скоро 11,1 милиони евра за капитални расходи, за девет месеци потрошило 50,42 проценти.

Повеќе ресори за девет месеци имаат реализација на капиталните расходи пониска од 30 отсто. Конкретно, Министерството за надворешни работи и трговија од предвидените 317.600 евра за капитални расходи потрошило 16,91 проценти, Министерството за финансии од расположливите 9,1 милиони евра реализирало 22,95 отсто. Министерството за транспорт кое располага со огромни 191,4 милиони евра за капитални расходи, на истекот од оваа година, заклучно со третиот квартал реализирало само 16,17 отсто од предвидените средства. Уште еден ресор – Министерството за труд и социјална работа, кое располага со износ повисок од 7,1 милиони евра за капитални расходи, заклучно со третиот квартал испорачало реализација од 25,02 проценти.

Министерството за култура од расположливите 1 милион евра потрошило 38,57 отсто, а  незначителна реализација на капиталните расходи од 1,36 отсто испорачало Министерството за локална самоуправа.

Дел од министерствата во оваа изборна година, заклучно со деветтиот месец, испорачаа симболична реализација на расходите за јавни инвестиции. Така, на пример, Министерството за политички систем, иако има незначителен износ од околу 3.000 евра по овој основ, од овие средства не потрошило ниту денар.

Во групата на ресори со 0 реализација на капиталните расходи се и новите – Министерството за енергетика за кое годинава по овој основ се планирани 4,3 милиони евра, Министерството за спорт кое располага со буџет од 6,5 милиони евра, како и Министерството за јавна администрација со буџет од 14.400 евра.

Податоците покажуваат дека институциите со „симболични“ износи за капитални расходи успеале да реализираат поголем дел од планот, па така, на пример, Комисијата за заштита на конкуренција од планираните 5.000 евра потрошила скоро 78 отсто, Државната комисија за жалби по јавни набавки од 4.000 евра реализирала 86 проценти, а речиси целосно се потрошени средствата за капитални инвестиции во Државниот инспекторат за техничка инспекција, Агенцијата за странски инвестиции и Уставниот суд.

Заклучно со третиот квартал, реализацијата на капиталните расходи изнесува 40,01 отсто или потрошени се 281,5 милиони евра.

Извор: МЕТА