ПУБЛИКУМ Вистината на прво место
Без разлика што претседателскиот кандидат неретко промовирал лесно дебанкирани содржини, неговата активност на Трут Сошал покажува дека тој објавувал „кобни теории на заговор на размери и фреквенција далеку повеќе од претходно“
Републиканскиот кандидат за претседател Доналд Трамп на сосема друго ниво (ре)објавува и споделува неточни и конспиративни содржини, пишува во новата анализа на американскиот Њујорк Тајмс. Во текот на половина година биле анализирани повеќе од 5 илјади објави, а најмногу од нив биле околу наводното мешање на администрацијата на Бајден во изборниот процес, како и за тоа дека претседателските избори во 2020 биле украдени, пишува Вистиномер.
Во пресрет на претстојните претседателски и конгресни избори во САД (05.11.2024), колегите од еминентниот Њујорк Тајмс направија темелна анализа на социјалната мрежа Трут Сошал (Truth Social), конкретно на содржината што претседателскиот кандидат Доналд Трамп редовно ја (ре)објавува преку својот профил. Како што пишува во анализата, без разлика што претседателскиот кандидат неретко промовирал лесно дебанкирани содржини, неговата активност на Трут Сошал покажува дека тој објавувал „кобни теории на заговор на размери и фреквенција далеку повеќе од претходно“.
Трамп е толку гладен за оваа содржина што се чини дека е подготвен да сподели чудни информации од кој било, вклучувајќи ги и познатите заговорници и анонимни профили што го означуваат [го линкуваат до] неговиот профил“ пишува во анализата.
Накратко, Трут Сошал e социјална платформа што наликува на Х (поранешен Твитер) и беше создадена две години откога на Трамп и многу од неговите следбеници им беше забранет пристапот до (или банирани) профилите на Твитер. Главната причина зошто им беше ограничен пристапот беше тоа што споделуваа конспиративна содржина велејќи дека американските претседателски избори во 2020 беа „украдени“. Но, и заради тоа што споделуваа дезинформации околу немирите во Капитол на 6 јануари 2021 година..
Иако Трут Сошал во просек имаше околу 4,7 милиони уникатни месечни посетители во периодот на истражувањето – главно поддржувачи на Трамп, ова е неспоредлива бројка со поголемите платформи како Фејсбук или X, кои бележат повеќе милијарда активни посетители. Покрај секојдневните фанови на Трамп, на платформата има еден куп десничарски медиуми кои генерално ги негираат ефектите или сериозноста на ковид, следбеници на „Кјуанон“ кои веруваат дека „длабоката држава“ е контролирана од сатанистички педофили.
Тој [Трамп] гради коалиција на луѓе кои едноставно го гледаат светот на многу мрачен начин. Реториката на Трамп не апелира кон традиционалните републикански вредности, туку е повик за оние кои само сакаат да го разнесат системот, изјави за Тајмс Џозеф Ушински, професор по политички науки на Универзитетот во Мајами.
Во анализата се нагласува дека не е јасно дали директно Трамп или некој од неговиот штаб ги напишал објавите, но, без разлика, сите објавени од неговиот официјален профил на Трут Сошал.
Во склоп на анализата, истражувачкиот тим на Тајмс прегледа над пет илјади (ре)објавени содржини oд профилот на Трамп во текот на шест месеци во 2024 година, односно меѓу 12 март и 12 септември. Треба да се напомене дека не сите објави беа анализирани, бидејќи бившиот претседател на САД објавува(ше) во просек по 30 содржини дневно и дел од нив беа промотивни материјали во рамки на неговата претседателска кампања.
За да се квалификува една објава за анализа, истата мора да содржи невистина, таен заговор насочен кон Трамп, неговите сојузници или јавноста, и точно да ги именува наводните сторители на заговорот како Еф Би Ај, Министерство за правда на САД и разни владини претставници за кои има сомненија за криминални дејствија. Меѓу непоткрепените теории кои се користат за ширење сомнеж или невистини се неговите два обида за атентат, немирите во Капитол од 6.0.2021 г., разните судски случаи во кои самиот Трамп е главниот обвинет или виновен.
Истражувачите од Њујорк Тајмс овие теории на заговор ги класификуваа во 10 различни теми. Темата за која броеше најмногу објави во периодот од шестте месеци кога се мониторираа истите беше за „мешање во изборите“ (election interference). Ова реферира на објавите од профилот на Трамп коишто директно влеваат сомнеж врз американската демократија и изборниот процес. А, во исто време се поврзани со сите тековни и затворени судски спорови против бившиот претседател што, според неговите објави, претставува директна интервенција во изборниот процес.
Друга најбројна тема ги вклучува објавите за бизнисменот Џорџ Сорос или неговото семејство, т.е. тврдења дека противниците на Трамп се марионети на филантропот и други „глобалистички“ актери.
Она што е клучно е дека објавите не влеваат сомнеж само на минатите, туку и за претстојните избори. Од профилот на Трамп беа споделени теории на заговор што ги „потврдува“ тврдења на Трамп дека изборите во 2020 г. беа наместени и нема да се дозволи сега повторно да се наместат.
Оваа изјава повеќе агенции ја проверија како неточна: Пи Би Ес, Ју Ес Еј Тудеј, Си Ен Ен. А, изборите во 2020 година беа прогласени за „најбезбедни“ од Агенцијата за сајбер безбедност и безбедност на инфраструктурата.
Цитирајќи го Макс Рид, истражувачки менаџер во Институтот за стратешки дијалог кој ги проучува изборните дезинформации, се наведува дека повеќемесечната кампања каде Трамп ги повторува неоснованите тврдења дека изборниот процес ќе биде компромитиран, ќе доведе до тоа да неговите следбеници на Трут Сошал не прифатат ништо друго освен победа на претседателските избори.
Кај кого ќе одите за да им верувате на изборните резултати? рече Рид. Тоа нема да бидат медиумите. Нема да бидат професионалци кои ќе ги спроведуваат изборите. Ако живеете во таа реалност и ги добивате тие информации на Трут Сошал ќе му верувате на Трамп и само на Трамп, изјави Макс Рид за Њујорк Тајмс.
Други објави погрешно тврдеа дека демократите ќе ги користат имигранти (кои не поседуваат соодветни документи) за да влијаат на изборите. Во видео објавено од Трамп директно се повикува на претходно споменатата екстремно десничарската и расистичка теорија на „Големата размена“, односно тврдењето дека моќните сили целат да ги заменат американските граѓани со имигранти и со тоа да се „замени“ демографијата на САД.
Лајтмотивoт што се проткајува во овие теории на заговор е верувањето дека Трамп е протагонистот или е на добрата страна, за разлика од неговите политички противници кои се негативците.
Речиси 400 дополнителни објави кои не се прикажани користеа речник препознатлив за теориите на заговор, но сами отворено не ја искажува самата теорија на заговор. Ова вклучуваше употреба на слогани и фрази што луѓето коишто веруваат во [конкретната] теорија ќе ги разберат, но просечниот човек можеби не, пишува во анализата на Тајмс.
Прелевање на содржината на другите социјални мрежи
Во анализата пишува дека во некои случаи корисниците на Трут Сошал постојано означуваат (тагнуваат) „Трамп“ и реплицираат на објавите на поранешниот претседател. А, тој понекогаш ги наградува со тоа што ги реобјавува нивните содржини. Без разлика дали се негови или тие содржини се (ре)објавени од профилот на Трамп, според Њујорк Тајмс, содржат „мрачна и параноична содржина“, редовно го зграпчуваат вниманието на публиката и стануваат вирални. Како директна последица, потоа, овие содржини природно се прелеваат и на другите социјални медиуми. На пример, да ја земеме следната објава што Трамп ја респодели на 12 април оваа година:
Ајде да добиеме администрација која е „Американска пред сѐ“! #Трамп2024“
Во објавата е споделена и оваа фотографија:
Сосема истата фотографија понатаму е споделена на Х (Твитер) и Инстаграм. А, понатаму, оваа фотографија се трансформира во речиси идентична, односно со истиот текст и истите лица на неа:
Втората фотографија, пак, може да се најде Фејсбук, Х (Твитер), Инстаграм, но и на социјалната мрежа којашто помалку се асоцира со дезинформации — Линкдин. Проблемот е во тоа што ваквиот тип на објави не се исклучок туку правило, и може да се најдат илјадници други вакви содржини кои итро се трансформирани, најверојатно да се избегне автоматизираната детекција.
Без разлика што уште пред четири години американскиот Вашингтон Пост нотираа дека Tрамп има споделено повеќе од 20 илјади неточни или невистинити содржини – особено при почетокот на Ковид пандмијата, со користењето на Трут Сошал платформата ова преминува во порој од дезинформации.
Извор: META
