ПУБЛИКУМ Вистината на прво место
Канадските власти јасно го отфрлија јавниот притисок на новоизбраниот американски претседател Доналд Трамп за спојување на Соединетите Американски Држави и Канада .
Канадскиот премиер Џастин Трудо, кој ден претходно најави оставка од функцијата, ја отфрли сугестијата на Доналд Трамп дека може да употреби „економска сила“ за да ја направи Канада, 51-ва американска сојузна држава.
„Шансите Канада да стане дел од Соединетите Држави се еднакви на изгледите за снежна топка во пеколот. Работниците во двете наши земји имаат корист од тоа што меѓусебно се најголеми трговски и безбедносни партнери“, напиша тој во објавата на платформата X.
There isn’t a snowball’s chance in hell that Canada would become part of the United States.
Workers and communities in both our countries benefit from being each other’s biggest trading and security partner.
— Justin Trudeau (@JustinTrudeau) January 7, 2025
Канадската министерка за надворешни работи Мелани Џоли, пак, напиша дека коментарите на Трамп „покажуваат целосен недостиг на разбирање за тоа што ја прави Канада силна земја“.
Доналд Трамп, претходно, на прес-конференција во Мар-а-Лаго, беше запрашан дали размислува да употреби воена сила за да ја припои Канада.
„Не, економска сила. Замислете ги САД и Канада заедно“, одговори тој.
Трамп, кој долго време се жалеше на трговскиот суфицит на Канада со САД, претходно им рече на новинарите дека границата меѓу двете земји е „вештачки исцртана линија“.
Тој се закани дека ќе воведе царини од 25 отсто за увозот од Канада, која испраќа 75 отсто од целиот извоз на стоки и услуги јужно од границата.
На неговата прес-конференција во Флорида, Трамп повторно зборуваше и за неговата идеја да ги стави Гренланд и Панамскиот канал под контрола на САД. Во овие два случаи тој не ја исклучи употребата на воена или на економска сила.
