ПУБЛИКУМ Вистината на прво место
Очекувано, Централната изборна комисија во Белорусија го прогласи седми пат по ред Александар Лукашенко за победник на претседателските избори, кои беа критикувани како нефер и неслободни. Според државната новинска агенција Белта, шефот на државата поддржан од Русија, кој е на власт 30 години, според прелиминарните резултати добил 86,82 отсто од гласовите. Ова го соопшти Игор Карпенко, претставник на Информативниот центар на белоруската Централна изборна комисија
Тој потврди дека противкандидатот на Лукашенко Олег Гајдукевич освоил 2,02 отсто од гласовите, кандидатката Ана Канопатскаја 1,86 отсто, Сергеј Сиранков 3,21 отсто и Александар Кизњак 1,74 отсто од гласовите.
Овој наводен удел на гласови е најголемиот досега доделен на Лукашенко. Излезноста на гласачите во земјата, која често се нарекува последна европска диктатура, беше 85,7 отсто, што е повисоко отколку во 2020 година (84,38 отсто). Лукашенко тогаш беше прогласен за победник со 80,1 отсто од гласовите.
Без сериозни противкандидати
„Морате да знаете дека бројките објавени во Белорусија немаат никаква врска со реалноста“, изјави за агенцијата ДПА политикологот Валери Карбалјевич, кој побегна во егзил бидејќи неговиот живот бил во опасност. „Државниот апарат однапред ги одредува бројките.“
Според Карбалјевич, на избори со вистински противници, Лукашенко нема да има шанси да победи. На изборите им беше дозволено да учествуваат на четворица опозициски кандидати, за кои се знае дека се жестоки поддржувачи на Лукашенко и се сметаат за обични статисти.
ЕУ: Нелегитимни избори во Белорусија
Во меѓувреме, високата претставничка на ЕУ за надворешна политика и безбедност, Каја Калас, и комесарката за проширување на ЕУ, Марта Кос, соопштија дека ЕУ смета дека претседателските избори во Белорусија биле нелегитимни. Калас и Кос најавија дека Унијата ќе продолжи да воведува рестриктивни и насочени мерки против режимот, со финансиска поддршка од граѓанското општество.
Во заедничката изјава Калас и Кос изјавија дека „лажните избори во Белорусија“ не биле ниту слободни ниту фер и дека народот на Белорусија заслужува вистински збор за тоа кој ќе управува со нивната земја.
