„Блаже Конески, минато – сегашност – иднина“, манифестација по повод 100-годишнината од раѓањето на „џинот од Небрегово“

Во организација на Фондацијата за македонски јазик „Небрегово“, денеска во родното место на Блаже Конески се одржа настан по повод 100-годишнината од неговото раѓање.

Во своето обраќање пред присутните, градоначалникот Илија Јованоски истакна дека е одговорна и неблагодарна работа да се зборува за Конески, бидејќи е тешко е да се наброи сето она кое тој го остави зад себе, а притоа да не се испушти уште некој сегмент од неговото пребогато дело.

„Конески беше еден од кодификаторите на современиот македонски литературен јазик и значајна личност во македонската книжевност. Втемелувач на македонистиката на Филолошкиот факултет, кој денес го носи неговото име. Ректор на Универзитетот ‘Свети Кирил и Методиј’, член и прв претседател на МАНУ. Конески е добитник на значајни домашни и меѓународни награди и признанија и затоа никого не треба да чуди што во чест на 100-годишнината од неговото раѓање, Владата ја усвои Националната програма ‘2021 – Година во чест на Блаже Конески’. На тој начин, нашата земја и официјално се приклучи кон одлуката на Генералното собрание на Обединетите нации, 2021 година да ја прогласи за Меѓународна година на мирот и довербата. Најкраткиот заеднички содржател за неговите постигнувања е – Блаже Конески е џинот од Небрегово!“, рече градоначалникот Јованоски.

„Во оваа година на мирот и добрососедството, делото на Блаже Конески донесе мир на овие простори, затоа што тој го одреди клучниот идентитетски знак на еден народ, а тоа е јазикот. Македонскиот јазик останува нашата трајна вредност, придобивка и должност е на оваа Влада и на сите генерации, тоа дело да го развиваат и чуваат“, нагласи националниот координатор во Владата, Роберт Алаѓозовски.

„Голема е честа во текот на 2021 година да се слават два јубилеја: 100 години од раѓањето на големиот Блаже Конески и 20 години од постоењето на Фондацијата за македонски јазик ‘Небрегово’. Ваков убав спој ретко се случува. Фондацијата заедно со надлежните државни органи, со сите други културни и научни институции, направи бројни манифестации во многу градови. Таквите активности, Фондацијата ги продолжува и натаму, во текот на целата година“, потенцираше Атанас Конески, секретар на Фондацијата „Небрегово“.

На денешниот настан на кој присуствуваше и Архиепископот Охридски и Македонски г.г.Стефан, на повеќе заслужни институции и поединци, Фондацијата им додели признанија и плакети со ликот на Блаже Конески.

Прочитајте повеќе

Талевски: ДПМНЕ и Тошковски ја загрозуваат безбедноста на граѓаните

Прес-конференција на Миле Талевски, пратеник на СДСМ Почитувани граѓани, Два месеца откако ВМРО-ДПМНЕ го презеде …