Бугарија и Романија се полноправни членки на Шенген од 1 јануари

Советот за правда и внатрешни работи на ЕУ донесе одлука за укинување на контролите на патниците на копнените граници на Романија и Бугарија со земјите од Шенген зоната од 1 јануари 2025 година.

„Ова е историски момент. Бугарија и Романија конечно стануваат полноправни членки на Шенген зоната“, изјави унгарски министер за внатрешни работи Шандор Пинтер.

Според Пинтер, укинувањето на контролите на патниците на внатрешните копнени граници меѓу двете земји и останатите членки на Шенген зоната беше еден од главните приоритети на унгарското претседателство со ЕУ.

Бугарија и Романија беа примени во Шенген зоната на 31 март годинава, но при тоа беа укинати само контролите на внатрешните воздушни и водени гранични премини, додека останаа во сила проверките на лицата кои ги минуваа копнените граници меѓу двете земји и останатите Шенген држави.

Во одлуката на Советот за правда и внатрешни работи на ЕУ за целосно укинување на копнените гранични контроли се наведува дека од нивното пристапување кон Унијата, Бугарија и Романија применуваат делови од правната регулатива на Шенген зоната, вклучувајќи ги и оние кои се однесуваат на контролите на надворешните граници, полициската соработка и користењето на шенгенскиот информациски систем.

Извор: МЕТА