ПУБЛИКУМ Вистината на прво место
Бундесратот го одобри финансискиот пакет на ЦДУ/ЦСУ и СПД за инвестиции во одбраната и инфраструктурата кој треба да се финансира со задолжување. Со 53 од 69 гласа, беше постигнато потребното двотретинско мнозинство. Само покраините Бранденбург, Саксонија-Анхалт, Тирингија и Рајнланд-Пфалц беа воздржани, а сите други покраини гласаа „за“. Воздржаните во Бундесратот се сметаат како гласови „против“.
Со денешното гласање е надмината последната парламентарна пречка за проектот, кој предвидува олабавување на должничката кочница за трошоците за одбрана и специјален фонд од 500 милијарди евра за инфраструктура и заштита на климата. Тоа значи дека може да се направат соодветни промени на Уставот.
Согласност во последен момент
Двотретинското мнозинство долго време се сметаше за неизвесно бидејќи не беше јасно како ќе гласаат покраинските влади во кои дел од владеачките коалиции се Левицата, ФДП, Слободните гласачи (ФВ) и Сојузот Сара Вагенкнехт (БСВ). Баварија во понеделникот соопшти дека ќе гласа „за“, а изутринава согласност најавија и Мекленбург-Предна Померанија и Бремен. Во двете покраини има влади на СПД и Левица. Согласноста на покрраините каде владеат СПД, Унијата и Зелените се сметаше за сигурна.
Со законот се олабавува должничката кочница содржана во Уставот, која поставува строги ограничувања кога станува збор за ново задолжување. Олабавувањето се однесува на трошоци за одбраната, цивилната заштита, разузнавачките служби и сајбер безбедноста. За сите вакви трошоци во иднина, кои ќе надминуваат еден процент од брутодомашниот производ, ќе смеат да се земаат кредити.
Дополнително, ќе се создаде посебен фонд за кој не важи должничката кочница и кој ќе се финансира со кредити вкупно до 500 милијарди евра. Овие пари се наменети за санација на дотраената инфраструктура во Германија. 100 милијарди евра треба да одат во сојузните покраини, а 100 милијарди евра треба да се инвестираат во заштитата на климата.
Законот треба да биде потпишан од претседател Франк-Валтер Штајнмајер, кој проверува дали тој е донесен согласно Уставот.
