ПУБЛИКУМ Вистината на прво место
Во Данска има повеќе од само политички отпор кон плановите на американскиот претседател Доналд Трамп да го преземе Гренланд. Најнова онлајн петиција сугерира дека Данска може да ја купи државата Калифорнија од САД – и е успешна: до средата, повеќе од 200.000 потписници веќе се приклучија на сатиричниот предлог.
Анонимните иницијатори на повикот под мотото „Måke Califørnia Great Ægain” (засновано на мотото на кампањата на Трамп „Make America Great Again“) се сигурни: „Трамп би можел да продаде“. На вебстраницата denmarkification, тие ги повикуваат луѓето да се приклучат на „грандиозната кампања”.
„Дали некогаш сте погледнале на некоја мапа и сте помислиле: на Данска ѝ треба повеќе сонце, палми и ролери? Па, сега имаме единствена можност да го оствариме овој сон. Да ја купиме Калифорнија од Доналд Трамп! Следната авантура на Данска.“
Дизниленд би можел да се преименува во „Ханс Кристијан Андерсенленд“ во чест на познатиот дански поет и писател, а Мики Маус би добил викиншка капа – „зошто да не?“ Покрај тоа, според иницијаторите, Трамп никогаш не бил голем обожавател на демократски управуваната држава. Целта на иницијаторите е да соберат половина милион потписи.
Во декември, Трамп ја претстави идејата за преземање на Гренланд од страна на САД и не отфрли воени операции. Проектот наиде на отпор како во Данска, на која и припаѓа автономниот регион, така и во самиот Гренланд. Владата на островот порача дека нема интерес да стане дел од САД и дека е отворена само за инвестиции.
Сепак, политичарите стравуваат од странско влијание по коментарите на Трамп. Минатата недела парламентот на Гренланд донесе закон со кој се забрануваат странски партиски донации. Регионалните избори ќе се одржат во Гренланд на 11 март.
Гренланд, кој географски припаѓа на Северна Америка, беше колонизиран од Данска во 18 век и има автономен статус од 1979 година, кој беше проширен во 2009 година.
