Џезот ја крена на нозе ресенската публика

Трите денови исполнети со џез музика, кои се одржаа од 14-16 август пред таверната на ресенскиот плоштад, донесоа многу публика и забава, како и уметнички ликовни креации. Во организација на Домот на културата „Драги Тозија“, настапија групите Skopje jazzinc, Александар Петров и Transmision project, Sethstat + Мирко Попов.

„Ова е прекрасна забава за нас младите. Има добра музика, а вака се собираме на едно место, па можеме и да се видиме, да се дружиме. Три вечери со џез музика во живо беше одлична можност топлите ноќи да ги поминеме на плоштадот во Ресен, да дојдат од сите краишта на Преспа, а беа присутни и многу доселеници“, рекоа присутните на џез вечерите.

Директорот на Домот на културата „Драги Тозија“, Васко Василевски, истакна дека бројната публика во рамките на трите џез вечери е мотив повеќе постојано да се организираат настани и манифестации, во интерес на локалното население.

„На младите им треба забава, особено во летниот период кога студентите се дома, а присутни се и гости од странство. Нашата заложба, како културна институција, не е само да организираме некој културен настан, туку и да ја подигнеме креативноста кај младите. Тоа и се случи на овие џез вечери, затоа што младите ја покажаа и својата креативност, творејќи на платно“, посочи Василевски.

Во Ресен продолжуваат културните настани во организација на Домот на културата „Драги Тозија“. Вечерва, со почеток во 19.30 часот, ќе се одржи промоција на светски познатата поезија на Руми „Два света”. Промотори и интерпретатори на дел од песните ќе биде преведувачот Тихомир Јанчовски, во придружба на Добрила Грашевска, вокалист на Чалгија саунд систем, митрополитот Пимен и струмичкиот поет Митко Гогов.