ПУБЛИКУМ Вистината на прво место
Државната изборна комисија (ДИК) до овој момент добила вкупно 15 приговори во однос на првиот круг од локалните избори. Два приговора од опозициската коалиција предводена од ВМРО-ДПМНЕ се поднесени за прекршување на изборниот молк, додека останатите 13 приговори се однесуваат на постапката за гласање и за постапката за сумирање и утврдување на резултатите до Државната изборна комисија.
Владејачката коалиција предводена од СДСМ поднела два приговора за гласањето на две избирачки места во општина Јегуновце, како и по еден приговор за гласањето во општина Ѓорче Петров, општина Македонска Каменица. Алијанса за Албанците поднела по еден приговор за избирачко место за гласањето во Дебар и Шуто Оризари.
ВМРО-ДПМНЕ и нивната коалиција поднеле по еден приговор за гласањето во општините Центар, Долнени и Сарај.
Дури четири приговори поднела коалицијата Алијанса за Албанците и Алтернатива за гласањето на четири избирачки места во општина Гостивар, и тоа по два за конкретни избирачки места и два приговора што се однесуваат на сумирање на резултатите за избор на градоначалник и совет на општина Гостивар.
Државната изборна комисија дополнително ќе закаже седница за разгледување и одлучување по приговорите, по што ќе се знае какви ќе бидат последиците по изборните резултати во овие општини.
