ЕУ не разгоре крвава војна во Украина, тоа го стори Русија

Поддршката за Украина е во согласност со нејзиното право на самоодбрана. Неточно е да се каже дека ЕУ или некоја европска држава ја испровоцирала воената инвазија. Русија не беше нападната од никого, туку таа ја нападна Украина, пишува Вистиномер.

Рецензираме објава на социјалната мрежа Фејсбук во која пишува:

Колку се јадни овие од ЕУ, им се потпалија гаќите!

Ќе решавале за Украина!?

1800 МИЛИЈАРДИ МИ ЕВРА ДАДЕНИ ЗА ОРУЖЈЕ, зошто беа ЗА МИР!?

ИЛИ ЗА КРВОПРОЛЕВАЊЕ!?

ЗАСРАМРЕТЕ СЕ РАЗГОРЕВТЕ КРВАВА ВОЈНА НА ТЛОТО НА ЕВРОПА!?

И тоа после најголемото крвопролевање од 2 СВ!

ОЧИГЛЕДНО ДЕКА МАЛОУМИЕТО ВИ Е ВО ГЕНОТ, ВО ИМБЕЦИЛНОСТА НО И ЗЛОБАТА КОН СЛАВЈАНСТВОТО!

Бајден и Дип Стејт ве матката како малоумни.

Е кај Трамп нема трите мрте, со глупави тиквари не се занимава!

Наспроти изнесеното во објавата, не ЕУ туку Русија ја разгоре крвавата војна во Украина. НАТО и ЕУ земјите членки даваа помош во правото на Украина да се одбрани.

На 24 февруари 2022 година, Русија започна војна на агресија против Украина, предизвикувајќи ги аспирациите на Украинците за подобра иднина и за приближување кон ЕУ. Ова беше напад, не само против Украина, туку и против слободата, самоопределувањето и демократијата. Уште од почетокот на војната, ЕУ се залага за Украина со непоколеблива посветеност. На земјата ѝ пруживме  политичка, финансиска, воена и хуманитарна поддршка и пречекавме милиони Украинци кои бараат засолниште во земјите-членки, пишува на сајтот на Европската kомисија.

Поддршката за Украина е во согласност со нејзиното право на самоодбрана. Неточно е да се каже дека ЕУ или некоја европска држава ја испровоцирала воената инвазија. Всушност, Русија не беше нападната од никого.

Русија ја започна војната против Украина без да биде загрозена од Украина или која било друга земја во Европа.

Незаконски го анектираше Крим во 2014 година и продолжи со заземање територии во Доњецк и Луганск. И во 2022 година, со целосната инвазија на Русија на Украина, започна најкрвавиот конфликт во Европа од Втората светска војна. Русија ги погоди болниците, училиштата и трговските центри. Русија ја бомбардира цивилната енергетска и водна инфраструктура. Русија убива украински цивили. Украина има право и одговорност да го заштити својот народ. Самоодбраната е фундаментално право, кое е вградено во Повелбата на ОН. А, НАТО има право да ја поддржи Украина додека се обидува да го поддржи нејзиното право на самоодбрана и да преовладува како суверена држава во Европа. Самоодбраната и поддршката на самоодбраната е во согласност со меѓународното право, пишува на сајтот на НАТО.

Пред агресивните дејствија на Русија против Украина во 2014 година, немаше постојано распоредување на мултинационални трупи на НАТО во источниот дел на Алијансата. Како што безбедносното опкружување се промени по нелегалното анектирање на Крим од страна на Русија и дестабилизацијата на источна Украина, НАТО ја прекина практичната соработка со Русија, истовремено одржувајќи политички и воен дијалог, и распореди четири мултинационални борбени групи во балтичките држави и Полска во 2016 година.

Како реакција на целосната инвазија на Русија на Украина во 2022 година, НАТО го зајакна своето  одбранбено држење. Го удвоивме бројот на мултинационални борбени групи на истокот на Алијансата од четири на осум. Ќе продолжиме да го правиме она што е потребно за да ги заштитиме и одбраниме сите сојузници. Агресивните дејства на Русија ја поткопуваат меѓународната безбедност и стабилност. Покрај нејзината агресија врз Украина, Русија има воени бази и војници во Грузија и Молдавија без согласност на владите на овие земји, наведуваат од НАТО.

Откако Русија ја нападна Украина, таа почна да се брани затоа што граѓаните на Украина не се согласуваат да бидат територијално преземени од Русија.  Европскиот совет на 9 февруари 2023 година побара Русија да се повлече од територијата што не е нејзина и во која навлезе (Украина), ама тоа не се случи.

Русија мора веднаш да ја прекине оваа страшна војна. Европската Унија ќе застане до Украина со својата цврста поддршка онолку долго колку што е потребно, стои во заклучоците на Европскиот совет од 9 февруари 2023 година.

Лидерите на ЕУ во неколку наврати побараа Русија да ги прекине своите воени акции, безусловно да ги повлече сите сили и воена опрема од Украина и целосно да го почитува територијалниот интегритет, суверенитет и независност на Украина.

Во објавата невистинито се тврди дека ЕУ дале 1.800 милијарди евра за оружје на Украина. ЕУ и 27-те земји членки од почетокот на војната на Украина ѝ овозможија 145 милијарди долари во финансиска, воена, хуманитарна и помош за бегалци. Значи, од тие пари (145 милијарди долари) не сите се за оружје. Во февруари 2024 европските лидери се согласија да овозможат 54 милијарди долари до 2027 година за да се овозможи опоравување, реконструкција и модернизација на Украина како и за нејзините напори да спроведе реформи како дел од пристапниот пат кон ЕУ.

Не може со сигурност да се каже, дали без воената помош на ЕУ ќе имаше помалку или повеќе крвопролевање. Хипотетички, можеше да се случи да имаше повеќе крвопролевање без западната воена помош. Русија можеби во таквата ситуација ќе освоеше поголема украинска територија, повеќе градови и села и ќе имаше повеќе злосторства. Познато е дека руската војска има убиено недолжни цивили како на пример во Буча.

Познат е случајот на егзекуции на украински воени заробеници од страна Русија. Доколку фронтот се зголемеше на поголем дел од територијата на Украина, никој не може да тврди дали ваквите злосторства ќе се зголемеа или намалеа.

Поради сите горенаведени факти објавата што ја рецензираме ја оценуваме како невистина.

Извор: МЕТА