Филипче: Бесплатната вакцинација против сезонски грип почнува од утре, петок 22 ноември

Министерот за здравство доц. д-р Венко Филипче и директорот на Здравствен Дом Скопје Виктор Исјановски, денеска информираа дека бесплатната вакцинација против сезонски грип почнува од утре, петок 22 ноември.

За оваа сезона набавени се вкупно 28.000 вакцини, кои се бесплатни и наменети се за лица над 65 години, лица со хронични заболувања, деца на возраст од 6 месеци до 5 години, бремени жени, како и здравствени работници.

Центрите за јавно здравје набавија 21.000 комерцијална вакцина, кои веќе се достапни за граѓаните од понеделникот.

Се подобрува достапноста на бесплатните вакцини против сезонски грип и од оваа година, покрај 10-те Центри за јавно здравје, во вакцинацијата се вклучени и трите поликлиники: Букурешт, Чаир и Ѓорче Петров при Здравствениот Дом во Скопје.

Во Центрите за јавно здравје, вакцинацијата ќе се одвива во две смени, додека пак, бесплатната вакцинација во трите поликлиники ќе се одвива во периодот од 14:00 до 18:00 часот.

Станува збор за вакцини од реномирани странски производители, меѓу кои 27.000 вакцини се од Mylon Abot, а илјада вакцини од Sanofi.

Како и во изминативе сезони, пикот на активноста на вирусот на сезонски грип се очекува во месец февруари, а вакцинацијата во овој период, ноември и декември ќе обезбеди најголема заштита во периодот кога се очекува активноста на вирусот да биде највисока.