Филипче: Не е лесно, но чекор по чекор СДСМ ќе ги реши сите предизвици (Галерија)

Во организација на ОО СДСМ Прилеп, а по повод Денот на народното востание 11 Октомври, денеска во манастирот „Св.Димитрија“ во с.Селце се одржа традиционалната манифестација „Празнувај  дружи се“, на која присуствуваше и претседателот на СДСМ, д-р Венко Филипче.

Поздравувајќи ги присутните, претседателката на прилепските социлајдемократи, Петра Лукароска нагласи дека ОО СДСМ Прилеп го започна процесот на внатрепартиско консолидирање и преструктуирање. Во таа насока, во изминатите денови се одржаа работни состаноци за евидентирање кандидати за делегати на Конгрес и членови на Централниот и Надзорниот одбор на СДСМ, чии мандати ќе бидат верифицирани на општинската Конференција која ќе се одржи во вторник, 15-ти октомври.

Истовремено, потенцираше Лукароска, по повод Светскиот ден на учителот и Светската недела на детето се одржа трибината „Да градиме квалитетни генерации ученици“, како и настан по повод Денот на народното востание, насловен како „Разговор со востаниците“.

„Членовите на СДСМ се враќаат, и тоа е доказ дека луѓето ја препознаваат нашата посветеност“, истакна во своето обраќање претседателот на СДСМ, Венко Филипче.

„Ние ќе ги решиме предизвиците, чекор по чекор. Не е лесно, но ќе ги решиме. Како претседател ветувам дека ќе ги изберам најдобрите луѓе – оние кои имаат поддршка од членовите, кои се подготвени да им служат на граѓаните, а не да се служат со нив. СДСМ ќе го врати гласот на членството. Секој член ќе има глас и влијание, затоа што СДСМ е партија на народот“, рече Филипче.

Во обраќањето, Филипче нагласи дека СДСМ нема да му дозволи на ВМРО-ДПМНЕ да ги држи државата и граѓаните во заложништво.

„Како што нашите предци на 11 Октомври се кренаа против угнетувањето, така и ние денес мора да се кренеме против оваа неспособна власт. Нема да дозволиме ВМРО-ДПМНЕ да ја држи Македонија во заложништво со своите лажни ветувања.СДСМ ќе ја врати Македонија на вистинскиот пат. Ќе ја вратиме надежта, ќе ја вратиме иднината и ќе се избориме за секој граѓанин“, порача од денешниот граѓански собир во манастирот „Св.Димитрија“ во с.Селце, претседателот на СДСМ, Венко Филипче.