Генерален штрајк во Србија: студентите повикаа на граѓанска непослушност, граѓаните не одат на работа, дел од продавниците се празни

Во Србија денес има генерален штрајк, односно „општограѓанска непослушност“, при што студентите во блокада ги повикаа граѓаните на Србија да не одат на работа, на предавања и да не ги извршуваат секојдневните обврски, јавува српскиот сервис на Н1.

„Ги земаме работите во свои раце. Вашето учество прави разлика“, им порачаа студентите на граѓаните.

Поддршка на акцијата најавија бројни компании, здруженија и политички партии. На генералниот штрајк се приклучија и дел од медиумите, а Н1 објави дека денес ќе известува само за штрајкот.

Најавено е дека во 11 часот и 52 минути на повеќе локации во земјата ќе продолжи комеморацијата во чест на загинатите во несреќата на железничката страница во Нови Сад, по што ќе следува генералниот штрајк.

За во 14 часот, пак, е закажан протест „Да разговараме, кој е толпа, а кој ѓубре“ (Da raspravimo, ko je rulja a ko hulja) во организација на одборот за протест на адвокатите пред зградата на Српското претседателство.

На генералниот штрајк се приклучуваат и средношколците.

Претседателот на ученичкиот парламент на Третата белградска гимназија, Стефан Марковиќ, за Н1 вели дека денес ќе имаат час во природа и генерален штрајк, при што пет часа ќе бидат на улица и ќе маршираат 15 километри низ Нов Белград.

Марковиќ вели дека средношколците во ова училиште имаат голема поддршка од наставниците, родителите и поранешните учесници за прекинот на наставата.

Движењето „Крени-промени“ објави неколку видеа на кои ја покажува својата поддршка за генералниот штрајк во Србија.

Едно од видеата е од продавници, кои вообичаено наутро биле преполни со потрошувачи, но не и денес.

Објавија и видео од центарот на Белград, во кое се вели дека централните белградски улици се речиси празни во утринскиот шпиц.