ПУБЛИКУМ Вистината на прво место
Германската влада ја обвини Русија за воени злосторства во Украина поради обновените напади врз енергетската инфраструктура што оставија голем број граѓани без греење и електрична енергија во екот на студената зима.
Заменик-портпаролот на германската влада, Штефен Мајер, предупреди дека „стотици илјади деца, постари лица и цели семејства се принудени да издржуваат смрзнувачки температури без електрична енергија, греење или топла вода“. Тој оцени дека „Путин го користи студот како оружје“, опишувајќи ги нападите како „длабоко нечовечки и крајно презриви кон човечкиот живот“.
„Според нашето гледиште, Русија на Путин извршува воени злосторства“, изјави Мајер во Берлин.
Според украинскиот претседател Володимир Зеленски, над еден милион жители само во Киев се без електрична енергија по најновите руски напади.
Германија ги осуди масовните руски воздушни напади „најостро возможно“, нагласувајќи дека, и покрај бројните други меѓународни кризи, настаните во Украина бараат јасно внимание и фокус. Завршувањето на војната, според Берлин, мора да остане „централна заедничка цел на Европа, Украина, САД и меѓународната заедница“.
Извор: DW
