Горазд Китановски- Кени е победник на националниот слем натпревар

Во киното „Мис Стон“ во Прилеп викендов се одржа единаесеттиот национален слем натпревар, на кој за титулата национален победник/национална победничка се натпреваруваа дваесеттина слемери и слемерки.

Национален победник во слем-поезија за 2021 година е младиот слемер и изведувач Горазд Китановски- Кени од Скопје, соопштија од Поетри слем на Македонија.

Кени ѝ е познат на јавноста по својот поетски перформанс на изведување и читање поезија во автобус на ЈСП на почетокот годинава, како и по мултидимензионалниот перформанс посветен на Скопје – „Градот убав“, што се одржа во Музејот на современа уметност во рамките на настанот „Бела ноќ“ минатата година.

Второ место на националниот слем натпревар освои прилепчанецот Никола Дукоски, а трето Валерија Дамчевска од Битола.

Како што додаваат организаторите, традиционално, победникот на националниот слем натпревар ќе ја претставува Македонија на Европското слем-првенство, на кое досега како македонски претставници се натпреваруваа Афродита Николова, Игор Трпчески – Трпче, Марија Грубор и Елена Пренџова.

Специјален гостин на вечерта беше данскиот поет Мартин Глас Серуп, чии песни во препев на македонски и англиски јазик ги читаа Драгица Здравеска, Добрила Грашевска, Цветанка Колева и Билјана Волчевска.

Вовед во настанот беше кратката промоција на стихозбирката Пред некое време од Тихомир Јанчовски. Националниот слем-натпревар истовремено го промовираше и слем-зборникот „11 години поетски слем Македонија 2021“  во кој се објавени дваесет и осум слем автори и авторки.

Традиционалниот национален слем-натпревар е во организација на „Театарска работилница“ – Прилеп и Игор Трпчески – Трпче и во коорганизација на Елена Пренџова.

Извор:МЕТА

Прочитајте повеќе

Зарина Првасевда

Зарина Првасевда ја пее „Билбил пее во планина“ на врвот Пелистер (ВИДЕО)

Уживајте во неверојатната изведба на Зарина Првасевда, која ја  пее „Билбил пее во планина“ на …