Градоначалникот Јованоски во посета на Дневниот центар „Ѕуница“

Пред завршувањето на проектот „Општинско корисна работа“, градоначалникот Илија
Јованоски денеска го посети Дневниот центар за деца со посебни потреби „Ѕуница“. Покрај средбата со двете ангажирани лица кои работат како психолози, а се дел од проектот, од име на локалната самоуправа, градоначалникот на Дневниот центар му донираше нагледни средства.

„Општина Прилеп по четврт пат во 4 институции од нашиот град го имплементира проектот „Општинско корисна работа“. Со финансиска поддршка на УНДП, Агенцијата за вработување и Министерството за труд и социјална политика, во 4 организации привремено се вработени 15 лица, од кои 7 во детските градинки, 5 во домот за стари лица „Киро Крстески-Платник“, 2 во Дневниот центар „Ѕуница“ и едно лице во ООУ „Добре Јованоски“. Се надевам дека со помош на УНДП, проектот ќе продолжи и понатаму да се имплементира и дека ќе најдеме заеднички јазик со вработените, со цел да нема прекин на континуитетот во нивната работа“, изјави градоначалникот Јованоски.

„Ние сме многу задоволни од текот на проектот. Стекнавме практични знаења кои ќе ни помогнат при вработувањето. Исто така, се надеваме дека проектот ќе продолжи бидејќи мислиме дека многу помогнавме во оспособувањето на децата, со кои работевме и индивидуално и групно“, вели психологот Елена Милеска, која заедно со нејзината колешка Катерина Кировакова, 6 месеци работеа со штитениците на Дневниот центар.

И во Меѓуопштинскиот центар за социјална работа се задоволни од постигнатите резултати и, воедно, се надеваат дека имплементацијата на проектот ќе продолжи.
„Задоволство е да ги оценуваме резултатите на „Општинско корисната работа“ која овде, во оваа наша установа, со двајца психолози во период од 6 месеци споделувавме искуствени знаења, кои понатаму и ним и нам ќе ни користат во работата. Благодарни сме на политиките на локалната самоуправа која ни го овозможи ова, заедно со Министерството за труд и социјална политика, УНДП и Агенцијата за вработување. Се надевам дека и во наредниот период истата оваа работа, на ваков или уште подобар начин, ќе се повтори“, истакна Живко Силјаноски, вд директор на прилепскиот Меѓуопштински центар за социјална работа.

Дневниот центар за деца со посебни потреби „Ѕуница“, го посетуваат 20 штитеници. Проектот има за цел преку општинско корисна работа да се обезбедат поквалитетни социјални услуги за граѓаните на локално ниво и, истовремено, да им се овозможи на невработените лица да стекнат работно искуство и подобри квалификации, со што ќе станат поконкурентни на пазарот на труд и ќе им се зголемат можностите за вработување.

Прочитајте повеќе

Георгиева од ЗЛС

Георгиева од ЗЛС: Во мандатот на Филипче освен плата, приватните специјализанти добија и платени дежурства (ВИДЕО)

Пред 2018 година не постоеше никаков надоместок за приватните специјализанти, значи таа категорија на лекари …