ПУБЛИКУМ Вистината на прво место
Се очекува ГЕРБ, партијата на поранешниот премиер Бојко Борисов, да освои најмногу гласови, но далеку помалку од 50 отсто – што најверојатно би довело до уште едни избори
Денес во Бугарија ќе се одржат парламентарни избори – седмите во изминатите четири години, пренесуваат „Дојче веле“ и „Јуроњуз“.
По масовните протести против корупцијата во државата во 2020 година, политичките партии во Бугарија континуирано не успеваат да формираат стабилна коалиција, поради што има толкав број на избори – во 2021 година се одржаа два парламентарни избори во три месеци.
Како и на сите избори досега во изминатиот период, се очекува ГЕРБ, партијата на поранешниот премиер Бојко Борисов, да освои најмногу гласови, но далеку од доволно за да се формира коалиција. Имено, на последните избори во јуни, Герб освои 24 отсто од гласовите, а центристичката партија ДПС, која ги претставува Турците и другите малцинства во државата освои 17 отсто од гласовите. Потоа, реформистичката коалиција ПП-ДБ освои 14 отсто, а новоформираната ултранационалистичка и проруска партија „Вараждане“ освои 13 отсто од гласовите.
Политичката состојба во државата има доведено до голема апатија во државата. На последните избори, во јуни, само 34 отсто од гласачите излегле да гласаат – најниската стапка од првите слободни избори во 1990 година. Дополнително, само 10 отсто од гласачите имаат доверба во изборниот процес. Во споредба, во просек, 60 отсто од граѓаните во Европа имаат доверба во изборниот процес на својата држава.
Според анкетите и анализите на консултантската фирма „Галуп“, Бугарија речиси постојано се наоѓа меѓу десетте држави со најниска доверба во изборниот систем во државата. Дополнително, само 17 отсто од граѓаните веруваат во правосудството, а само 46 отсто имале позитивно мислење за Европската Унија.
Според „Јуроњуз“, недовербата на граѓаните во системот е совршената плодна почва за ултранационалистичката партија „Вараждане“. Партијата првпат имаше пратеници во бугарското собрание во 2021 година, со 4 отсто од гласовите, а на овие избори се очекува да биде на трето, можеби дури и на второ место.
„Вараждане“ се залага да се воведе закон за „странски агенти“, сличен на оној кој неодамна беше одобрен во парламентот во Грузија, против кој имаше масовни протести. „Вараждане“ исто така стави на гласање закон со кој ќе се забранува ЛГБТИ+ „пропаганда“ – законот беше изгласан во август.
Се очекува „Вараждане“ да имаат многу влијание во формирањето на коалициите по изборите, особено бидејќи партијата ДПС, која беше втора на минатите избори, се подели во повеќе партии.
Извор: МЕТА
