Граѓаните да бидат претпазливи кога им се јавува некој од непознат број

Никогаш да не споделувате лични податоци, банкарски информации или лозинки преку телефон. Доколку се сомневате дека сте биле жртва на ваква измама, веднаш да го пријавите случајот во најблиската полициска станица, апелира МВР

Секторот за компјутерски криминал при Министерството за внатрешни работи активно презема мерки за истрага и справување со телефонските измами кои се вршат преку техники на пренасочување на телефонски броеви и лажирање на Caller ID, информира Министерството за внатрешни работи (МВР).

Оттаму велат дека овие измами во последно време се сѐ почести и имаат за цел да ги манипулираат граѓаните и со кои целта е стекнување на доверливи податоци или финансиски средства.

„Измамниците најчесто се претставуваат како претставници на банки, јавни институции или компании со цел да ги измамат жртвите. Секторот за компјутерски криминал изврши проверки во врска со телефонските измами и утврди дека за манипулација со повици можат да се користат повеќе алатки“, велат во МВР.

Една од алатките се VoIP Услуги: Услугите за глас преку интернет протокол (VoIP) овозможуваат корисниците да вршат повици преку интернет. Многу провајдери на VoIP нудат функции како пренасочување на повици, маскирање и рутирање преку виртуелни броеви. Потоа, апликација за лажирање: Софтвер и апликации, како “SpoofCard” или слични алатки, овозможуваат корисниците да го изменат Caller ID што се прикажува. Овие алатки се често промовирани за приватни или деловни цели, но може да бидат злоупотребени. Исто така измамниците користат PBX Системи (Приватни Разменувачки Мрежи): Бизнисите користат PBX системи за управување со дојдовни и излезни повици. Овие системи можат да пренасочуваат повици преку различни броеви и да го изменат Caller ID за професионални цели.

„SIM замена, се однесува на измамнички техники каде што напаѓачите го пренесуваат бројот на жртвата на друга SIM картичка за да пресретнат повици и пораки. Секторот за компјутерски криминал при МВР апелира до јавноста да биде претпазлива при примање на телефонски повици од непознати броеви или од броеви кои се претставуваат како доверливи институции. Никогаш да не споделувате лични податоци, банкарски информации или лозинки преку телефон. Доколку се сомневате дека сте биле жртва на ваква измама, веднаш да го пријавите случајот во најблиската полициска станица“, апелира МВР.

Извор: МЕТА