ПУБЛИКУМ Вистината на прво место
Според податоците на Државниот завод за статистика, Македонија има дефицит во размената со САД во 2024 година ако се сметаат добрата и услугите, но ако се исклучат услугите и се пресмета само трговијата со добра, тогаш САД има дефицит во 2024 година од околу 113 милиони долари
Премиерот Христијан Мицкоски смета дека воведувањето на 33 отсто царина за Македонија од страна на САД, што е една од највисоките царински стапки на Балканот, заедно со БиХ и Србија, најверојатно е грешка или резултат на погрешна информција. Како што рече на денешната прес-конференција во одговор на новинарско прашање, Мицкоски очекува ова многу скоро да се корегира.
„Ние работиме со нашите партнери од САД. Очекувам многу скоро да се корегира ова коешто очигледно е резултат на некаква грешка, или погрешна информација. Имајќи предвид дека нашата трговска размена со САД во 2024 е во негатива, односно сме во дефицит. Тие држави кои што се во дефицит, практично немаат ваков тип на зголемување на давачките,“ рече Мицкоски.
Мицкоски посочи дека Владата била во контакт со Амбасадата на САД, Министерството за Економија, и со кабинтетот на претседателот Трамп.
Министерот за надворешни работи Тимчо Муцунски во Брисел при средбата со Државниот секретар Марко Рубио разговарале за излегување од состојбата во која што САД моментално ја ставиле нашата земја.
Премиерот не откри што точно се разговарало со партнерите од САД, само изјави дека се работи за сензитивен процес и дека јавноста детално ќе биде информирана тогаш кога процесот ќе заврши.
„Што се однесува до тоа кој дел од економијата ќе биде погоден можам да кажам дека секундарните ефекти можеби ќе бидат поголеми односно доколку, да речеме, земјите од ЕУ не успеат да го надминат сето ова со САД, тогаш ефектите би биле многу поголеми отколку сега примарните ефекти кои ние ги имаме директно на билатерално ниво со САД,“ одговори Мицкоски на прашање за кој дел од македонската економија најмногу ќе биде погоден од воведените царини.
Инаку, според формулата на Белата куќа за пресметување реципрочни царини, предвид се зема дефицитот во трговската размена, но само на добра, а не на услуги. Така, според податоците на Државниот завод за статистика, Македонија има дефицит во размената со САД во 2024 година ако се сметаат добрата и услугите, но ако се исклучат услугите и предвид се земе само трговијата со добра, тогаш САД има дефицит во 2024 година од околу 113 милиони долари.
Извор: МЕТА
