ПУБЛИКУМ Вистината на прво место
Царинската управа на Република Северна Македонија спречи обид за нелегален пренос на готовина во износ од половина милион евра, кои биле пронајдени скриени во бункер на минибус. Оваа акција резултираше со историски најголемата заплена на девизи, како што информираше директорот на Царинската управа, Бобан Николовски, на денешната прес-конференција.
Детална контрола и брза реакција на царинското куче
Обидот за криумчарење е откриен за време на акција на Одделението за оперативни работи при влез во државата на граничниот премин Табановце. На преминот била извршена детална контрола на минибус, кој е во сопственост на туристичка агенција од Албанија, а со кој во моментот се превезувале седум патници.
Според директорот Николовски, акцијата во која биле вклучени мобилен тим, К9 единицата и Службата за мобилни скенери, била извршена исклучително брзо и ефикасно. Искусниот мобилен тим веднаш забележал преправки на возилото, по што било пуштено царинско куче кое недвосмислено укажало на индиции за криумчарење на истото место.
Сомнежите биле целосно потврдени откако возилото било скенирано од страна на Службата за мобилни скенери.
„Инспекторите од мобилниот тим пристапија кон отстранување на профилот во кој пронајдоа вкупно 14 проѕирни ќеси во кои беа спакувани 500 илјади евра“, изјави Николовски, порачувајќи дека секој обид за нелегален прекуграничен пренос на готовина ќе биде најстрого санкциониран.
Тој воедно упати и јавна благодарност до тимовите за нивната брза реакција и професионално одработена контрола.
Трајно одземени девизи и затворска казна за возачот
Сторителот на ова дело е државјанин на Република Албанија со иницијали Џ.Г., кој управувал со минибусот. Лицето било соодветно гонето за прекршувањето на законите, а за случајот веќе е изречена и судска пресуда од страна на Основниот суд Куманово.
Согласно законските прописи, пронајдените девизи и возилото со кое се вршел транспортот се трајно одземени. Запленетите финансиски средства се уредно предадени на Агенцијата за одземен имот, од каде што се депонирани во Народната банка.
