Израел изврши напад врз станбена зграда во Газа, загинаа најмалку 73 лица

Израелски воздушен напад синоќа погоди неколку куќи и станбена зграда во градот Беит Лахија во северниот дел на Газа, при што загинале најмалку 73 лица, соопшти Канцеларијата за медиуми на Хамас, а пренесе Гардијан.

Постојат извештаи и за потенцијални жртви заробени под урнатините во густо населената област. Палестинските здравствени власти рекоа дека спасувачките операции се отежнати поради исклучените телекомуникациски и интернет услуги кои се во прекин веќе втор ден.

Во меѓувреме, американската влада истражува наводно истекување на доверливи американски разузнавачки документи за израелските напади против Иран, јави Си-ен-ен. Документите кои датираат од 15 и 16 октомври, во петокот почнале да се споделуваат на Телеграм преку корисничка сметка наречена „Middle East Spectator“. Истрагата испитува и како се добиени документите, односно дали станува збор за намерно протекување од страна на член на американската разузнавачка агенција или пак се добиени со друг метод, како хакирање.

Куќата на израелскиот премиер Бенјамин Нетанјаху во приморскиот град Цезареја вчера беше погодена од беспилотно летало, предизвикувајќи површни штети, но без жртви. Ниту Нетанјаху ниту неговата сопруга Сара не биле дома во тоа време.

„Обидот на иранскиот полномошник Хезболах да ме убие мене и мојата сопруга денес беше голема грешка“, изјави вчера Нетанјаху, ветувајќи дека Иран и неговите помошници „ќе платата висока цена“.

Министрите за одбрана на земјите од Г7, на состанокот во Неапол, Италија изразија загриженост поради последните напади на Израел врз УНИФИЛ во Либан. Секретарот за одбрана на САД, Лојд Остин, рече дека САД би сакале Израел да намали некои од своите напади во и околу либанскиот главен град Бејрут.

„Бројот на цивилни жртви е премногу висок“, им рече Остин на новинарите на собирот во Неапол.

Извор: МЕТА