Кривичниот суд во Скопје денеска соопшти дека Советот за оценка на обвинителен акт го одобрил обвинението за случајот „Тендери“, со што ќе има судски процес и овој предмет на Специјалното јавно обвинителство, во кој првообвинета е поранешната министерка за култура, Елизабета Канческа – Милевска.

„Предметот по одобрениот обвинителен акт согласно Автоматизираниот компјутерски систем за управување со судските предмети (АКМИС – системот), електронски ќе биде распореден за понатамошно постапување, а кога ќе биде закажан термин за одржување главна расправа, јавноста ќе биде благовремено информирана“, стои во соопштението на судот.

Апелацискиот суд Скопје на почетокот на ноември, годинава одлучи прислушуваните разговори да се користат како доказ во судскиот процес за случајот „Тендери“.

Инаку, поранешната министерка за култура, Елизабета Канческа – Милевска, се товари за злоупотреба на службената положба, односно дека без завршена постапка за јавни набавки дозволила фирмата „Бетон Штип“ да изврши градежни работи во Музејот на ВМРО, со што, според СЈО, буџетот бил оштетен за 54 милиони денари или околу 878.000 евра.

Извор: МЕТА