Во потрагата по информации кои би го оптовариле американскиот претседател Доналд Трамп, демократите сега во визир го имаат и потпретседателот Мајк Пенс.

Се работи за разјаснување на улогата на американскиот потпретседател Мајк Пенс и неговите соработници во односот со Украина од почетокот на годинава, се вели во писмото на претседателите на трите комисии на Претставничкиот дом кои ја водат истрагата. Извештаите во јавноста, како што се вели, исфрлиле на површина прашања за улогата која можеби ја имал Мајк Пенс за „пренесување или зајакнување“ на пораката на Доналд Трамп до украинскиот претседател Володимир Зеленски. Од Пенс се бара до 15 октомври да ги поднесе документите, имејл-пораките и други материјали кои се однесуваат на Украина. Доколку тоа не се случи, тоа ќе биде сметано како попречување на истрагата за можна постапка за отповикување од функцијата на претседателот Трамп.

Истовремено, Демократите, кои имаат мнозинство во Претставничкиот дом, со закана со казна од Белата куќа бараат објавување на некои документи. Рокот за тоа истекува на 18 октомври, „Жалиме што претседателот Трамп, нас и целата земја, не’ доведе во ваква ситуација, но неговите постапки не ни оставаат друг избор“, се вели, меѓу другото, во писмото на претседателите на трите комисии.

Демократите, покрај останатите документи, ги бараат сите информации за два телефонски разговора со Зеленски, вклучително и интерната комуникација со други владини службеници. Освен тоа, пратениците бараат и информации за повеќе средби на кои станувало збор за Украина и сите документи за одобрување на американска помош за украинската армија.

Демократите минатата недела покренаа постапка за отповикување од функцијата на Доналд Трамп поради аферата со Украина. Американскиот претседател се најде под притисок откако стана познато дека во еден телефонски разговор на крајот на јули го охрабрил украинскиот претседател Зеленски на истрага против својот демократски ривал Џо Бајден и неговиот син Хантер. Во четвртокот Трамп и’ предложил и на Кина почнување такви истраги. Демократите го обвинуваат Трамп дека сака да победи на изборите во 2020 година со помош однадвор.

Извор: DW