Коцевски: Сообраќајката е предизвикана со умисла

Сообраќајната несреќа во којашто загина 22-годишната Фросина Кулакова била предизвикана со умисла. Обвинителството најавува дека ќе бара најстрога казна за 20-годишниот возач, кој според досегашните информации, возел без дозвола, под дејство на алкохол и со голема брзина по булеварот „Партизански одреди“ во Скопје.

Државниот јавен обвинител, Љупчо Коцевски на прес-конференција порача дека се преземаат сите дејствија за обезбедување докази за овој настан.

„Од досегашните докази за Обвинителстото е неспорно дека станува збор за кривично дело сторено со умисла. Затоа против осомничениот се води постапка за најтешко кривично дело од областа на сообраќајот. Постапката ќе биде ефикасна и обвинителството ќе бара најстрога казна“, рече Коцевски.

Нема индиции дека судијката направила кривично дело

Ваквата изјава следи како допрецизирање на ставот на Јавното обвинителство, во врска со трагичниот настан, кој предизвика лавина реакции и протести во главниот град. Претходно во изјава за емисијата „DailyClick“ на ТВ21, Коцевски рече дека се истражува дали Фросина Кулакова на булеварот „Партизански одреди“ во Скопје била прегазена со умисла или од небрежност. Тој е дециден дека Обвинителството ќе постапи професионално во случајот на загинатата студентка од Неготино.

„Се работи за изгубен млад живот кој не може да се надомести со никаква казна. Јавното обвинителство ќе постапи согласно законските одредби, ќе биде транспарентно во оваа постапка, ќе знаат граѓаните како ќе се одвива и во која насока ќе одат доказите“, вели Коцевски.

Во меѓувреме и Судскиот совет на Северна Македонија најави дека будно ги следи случувањата околу случајот со 20-годишниот возач од Скопје, Васил Јованов, кој под дејство на алкохол со голема брзина ја прегази студентката. Ќе се разгледуваат сите случаи каде има сомневања за пропусти од страна на судии за изречени пресуди, а казнената политика на судовите треба да биде предмет на сеопфатна анализа. Ваквата најава следи откако во јавноста беше побарана одговорност од судијката којашто му одредила воспитна мерка на Јованов, иако имал направено повеќе прекршоци.

Министерот за правда, Игор Филков ја разреши судијката Даниела Алексовска Стојановска од работната група во Министерството за правда, којашто работи на измените на Кривичниот законик. Порачувајќи дека нема да дозволи неказнивост или недопирливост, тој упати апел до судовите и Судскиот совет да преземат дејства со кои ќе се преиспита целиот случај со загинувањето на Фросина.

Јавниот обвинител Љупчо Коцевски вели дека засега немаат сомнежи во однос на судијката. „Немаме индиции за стоено кривично дело од страна на судијката“, вели тој.

Казната предвидена за вакви кривични дела од областа на безбедноста на сообраќајот е најмалку четири години до максимална казна од 20 години затвор. Министерството за правда воведе и ново кривично дело „Безобзирно управување со моторно возило“, со кое се пропишува затворска казна и до 3 години, односно казна затвор од 4 години доколку има и смртни последици.