Кој го советува премиерот Христијан Мицкоски?

Премиерот Христијан Мицкоски има 17 советници во неговиот тим – дел од нив се и поранешни најблиски соработници на експремиерот во бегство и поранешен лидер на ВМРО-ДПМНЕ, Никола Груевски. Листата на советници од денеска е и официјално достапна на страницата на Владата на Северна Македонија.

Поранешниот министер за финансии, Зоран Ставрески,се враќа во политиката како надворешен советник за финансии и банкарство. Поранешниот собраниски спикер, Трајко Вељаноски сега ја извршува функцијата на надворешен советник за собраниски, политички и правосуден систем, а ексвицепремиерот за економски прашања Владимир Пешевски го советува премиерот за стратешки прашања од областа на економијата. 

Поранешни функционери, професори и ексразузнавачи на листата

На листата се најдоа и Сашо Марковски како советник за надворешна политика и специјален претставник во процесот на преговори на претседателот на Владата со Европската комисија, Јоханес Хајдекер –интегриран експерт за зајакнување на капацитетот на економскиот тим во однос на подготовка и имплементација на владините економски политики со јасна стратешка ориентација кон процесот на пристапување во ЕУ, како и Цветко Мицевски како советник за инфраструктура. 

Премиерот го советува Гоце Наумовски за прашања од областа на правото, Лазар Јовевски за труд и социјална политика, Александар Спасеновски за европски прашања и Снежана Трпевска за образование, здравство и социјална заштита и спроведување на конвенцијата на ООН за правата на лицата со попреченост. 

Горан Николовски е задолжен за стратешки прашања од областа на безбедноста, Шенер Биљали за односи меѓу заедниците, Мимоза Рајл за култура, Љубчо Андоновски за национална безбедност, Јован Пејковски од областа на политичките и економските науки и Даме Димитровски за животна средина и клима. Уште неколку дена на советничката позиција за реформи во здравството ќе биде Игор Николов, кој наскоро ќе замине на амбасадорката позиција во Франција. 

Врз основа на член 8 од Одлуката за формирање на Канцеларијата, премиерот може да ангажира надворешни советници од редот на професори, научници, истакнати стопанственици и стручњаци кои поседуваат посебни знаења и искуства во областите на долгорочното стратешко планирање, во економскиот, политичкиот систем и човечките ресури и одржливиот развој. Надворешните советници се ангажираат за определено време до исполнување на ангажманот. Нивните хонорари се движат од 60 до 90 илјади денари, како што соопшти премиерот Мицкоски во вторникот.