Контраспин: Со измислиците за „фашистички мерки“ во владината кампања ВМРО-ДПМНЕ шири антиваксерство

Задоцнетиот почеток на масовната вакцинација, „фашистичките (рестриктивни) мерки“ и цената на кампањата, се три столба врз кои главната опозицска партија комуницира со јавноста дека кампањата е непотребна, што е класично извртување на вистината или спин, што пак, може да се толкува и како антиваксерски став или принцип, се одбележува во најновиот „Контраспин“ на „Вистиномер’.

Текстот подолу го пренесуваме во целост:

Во изминатите два дена имаме дури три соопштенија на ВМРО-ДПМНЕ (две соопштенија и една реакција) поврзани со почетокот на кампањата за вакцинирање од страна на Владата, при што во сите се забележуваат спинови:

Спин: 300 илјади евра чини кампањата на Заев и Филипче протов корона. Наместо лек против корона, народот доби реклами.

Зоран Заев и Венко Филипче со кампањата за вакцинација доцнат повеќе од девет месеци, доцнеа и со вакцини, а досега воведоа само фашистички мерки…

[Извор: ВМРО-ДПМНЕ-Соопштение, датум: 24.08.2021]

Спин: По повеќе од девет месеци или кон крај на минатата година кога во сите земји стартуваше вакцинацијата против корона, во Македонија ништо не беше на повидок ниту вакцини, ниту пак како да се стимулираат граѓаните да се вакцинираат.

Сега, повеќе од десет месеци по тоа, Зоран Заев и Венко Филипче решија да организираат кампања за да ги поттикнеле граѓаните на вакцинација.

Во меѓувреме, ги поделија на граѓаните, воведоа фашизоидни мерки и сега ќе терале кампања. Филипче и Заев ако сакаат да ги мотивираат граѓаните има милион начини како да го сторат…

[Извор: ВМРО-ДПМНЕ-Соопштение, датум: 23.08.2021]

Контраспин: Уште не беа се „оладиле“ техничките уреди од он-лајн прес конеренцијата на премиерот Зоран Заев и министерот за здравство Венко Филипче, на која што беше презентирана кампањата за масовна вакцинација против корона вирусот, главната опозициска партија излезе со ставови во кои се забележуваат спинови. Ден подоцна (24.08), лиферувани се уште две соопштенија, едното е превртена пирамида на она од претходниот ден, а второто, пак, реакција на прес одржан од СДСМ, но и во овие две, исто така, има спинувани информации.

Вакцинацијата доцнеше, ама за кампањи никогаш не е доцна

Главниот спин во сите три се сведува на ставот што го комуницира со јавноста оваа главна опозициска партија: кампањата е задоцнета, а ако сакале (Заев и Филипче) да ги поттикнат граѓаните имало милион начини! (само што од тие милион начини не е соопштен ниту еден – н.з.)

Спинот во оваа главна порака е дека сè што правеле политичките и здравствените власти во државата досега во однос на справувањето со пандемијата и во однос на вакцинацијата е задоцнето. Заклучокот кај јавноста би бил, чуму и сега кампања ако е задоцнета?

Се разбира дека е ова е извртување на вистината, кое се базира на основниот факт, дека масовната вакцинација кај нас започна некаде на почетокот на април, за што власта си понесе еден тон оправдани критики во јавноста, што од медиумите, што од граѓаните, дополнети и засилени од троловите по социјалните мрежи.

Но, откако почна масовната имунизација, кампањи имаше (со помош на ЕУ и домашни субјекти, како и со помош на УНИЦЕФ) и процесот со слабости и грешки од поситен организациски карактер (гужви на вакцинални пунктови поради затворањето на салата „Борис Трајковски“ на пример, грешка што сега се исправа), како и суштински проблем (најбројни се вакцините што побавно го создаваат имунитетот кај повозрасните лица, а тоа не се појаснува кај граѓаните), тече континуирано и ако продолжи со вакво темпо (над 12-13 илјади секој ден), ќе се достигне бројка што можеби нема да значи колективен имунитет, но значително ќе го стесни бројот на тешки компликации и смртни последици, што, пак, значи и одржлив притисок врз капацитетите на здравствениот систем.

Оттука, овој аргумент и логицирање на главната опозициска партија – демек „задоцнета ви е кампањава“, што упатува на комуникациска порака – нема потреба од кампања – е сосема погрешен, извртена вистина, т.е. спин.

„Фашистички мерки“ е небулоза и спин

Потполно истиот спин се детектира со „фашистичките мерки“, на забрани за користење угостителски објекти, молови и слично на невакцинираните или прележаните по 45 дена од прележувањето (Филипче признава на пресот – 40 мин. – дека за овој вториот, „медицинската логика“ е да се натераат и прележаните да се вакцинираат што побрзо).

Главниот аргумент е сосема јасен и тоа го прават и многу други демократски земји. Антиваксерите имаат право на избор (и на протести, што вели Заев), но и државата има право на заштита на јавното здравје генерално, гледано на целата популација.

Ако е факт дека вакцинираните со стекнат клеточен имунитет (и прележаните и вакцинирани), што заштитува во многу висок процент од тешка форма на болеста и смрт, имаат сè уште одреден процент на заштита и од инфекција, секоја држава мора да се грижи за колективното здравје и согласно потребите да воведува одредени рестриктивни мерки во смисла да го ограничи ширењето на заразата и да поттикнува вакцинација.

Впрочем, освен што тоа го прават и земји како што се ГерманијаАвстријаШвајцаријаФранцијаСАД.., веќе има претпоставки дека откако се воведени мерките на ограничување на користењето на угостителски објекти и моловите од 16 август кај нас, се намалува репродукцискиот број како параметар за епидемиолошката состојба во државата.

Според тоа, наместо инсистирање на небулозата „фашистички“, многу поефикасна и понеспинерска комуникациска порака на ВМРО-ДПМНЕ ќе беше ако инсистираше на прифаќање на одговорност за тоа, зошто мерките следат откако беше дозволена употреба на затворените угостителски простори за свадби (на домашни граѓани и на иселениците). Првиот човек на Комисијата што го советува Филипче, д-р Караџовски веќе призна во јавноста дека не биле послушани од власта, а „вирусот беше пречекан со сите почести“, што вели доктор Никола Пановски и тоа е факт од кој нема бегање, а Владата треба да си ја прифати одговорноста. И тука нема спин, но употребата на синтагмата „фашистички мерки“ е дефокус и спин.

Цената не смее да се употребува за спин

Конечно, употребата на сумите пари колку ќе чини кампањата, во извесна мерка е, исто така, извртување на вистината или спин, кога тој факт се користи како аргумент дека кампањи што толку чинат не ни требаат („Оваа нивна кампања чини 300 илјади евра, демек кампања на Заев и Филипче против корона. Тие наместо лек против корона, на народот му нудат реклами). Ова прашање е најлесно решливо и треба да се анализира на што ќе се исплатат тие пари, како и фактот дека приватните радиодифузери со национални  концесии се обединети околу ставот дека нема да емитуваат владини кампањи без пари (упориште наоѓаат кај законот и во аргументите и навиките од времето на владите на Никола Груевски).

Ова прашање е прашање и за Антикорупциската комисија и за медиумите, но секако не е прашање што не треба да се употребува во спин ефект, кој ќе се лепи за владината кампања.

Оттука, сите три елементи врз кои се потпираат ставовите на ВМРО-ДПМНЕ се споредни елементи и придонесуваат да се спинува, т.е. да се гради став дека кампањата е непотребна. Напротив, ако не им се верува на домашните статистики, тогаш белким германскиот Институт „Роберт Кох“ е релевантен и за верување. А нивните математики покажале дека „Невакцинираните се дури 98,5 проценти од жртвите на корона“.

Извор: МЕТА

Прочитајте повеќе

Талевски: ДПМНЕ и Тошковски ја загрозуваат безбедноста на граѓаните

Прес-конференција на Миле Талевски, пратеник на СДСМ Почитувани граѓани, Два месеца откако ВМРО-ДПМНЕ го презеде …