Корупцијата ги уништува зелените површини во Северна Македонија

Непочитувањето на Законот за урбано зеленило, бројните градби во градот и злоупотребата на зелените површини, беа во фокусот на дебатите на Форумот на тема: „Злоупотреба на урбаното зеленило за градби“ што се организираше во Скопје, пишува Порталб.мк.

Архитектите се децидни дека процесот на намалување на зелените површини во центарот на градот е интензивиран.

„Веќе сме во фаза кога ни треба синхронизација на правните акти и можеби еден со попрецизна и појасна терминологија во регулативата за обработка на урбанистичките планови и натамошна имплементација од страна на локалните власти“, рече архитектот Иван Арсовски.

„Иако е забрането, за чудо како со магија, ние го губиме зеленилото преку разни процеси и постапки. Кога нешто е забрането, а нешто друго се случува, тогаш се јавува сомнеж дека тука има корупција“, изјави архитектката и носителка на проектот „Граѓаните против корупцијата во животната средина“, Ана Петровска.

Градоначалникот на општина Кисела Вода, Орце Горгиевски, оценува дека се што треба да се изгради мора да се гради според план.

„Некои во минатото сакаа да ги карактеризира урбан хаос. Јас сум човек кој се стреми кон спротивното. Не секогаш ќе им бидете омилени на инвеститорите и градежниците. Вие знаете дека не е едноставен процес да се поништи градежна дозвола што некој ја издал во минатото“, рече меѓу другото Георгиевски.

Околу тоа колку е нелогично зелените површини да се третираат како празен, неискористен простор, полемизираше активистот и член на Советот на општината во општина Центар, Јане Димовски.

„Јас им се лутам и на урбанистите, сега можеби ова им е технички термин преку кој опишуваат една фаза од плановите, велат на местата каде што нешто се гради имаме развој. Развојот не е термин што го користиме кога градиме. Од овој развој ние губиме се. Се давиме“, рече Димовски.

На дебатата немаше претставници од Министерството за животна средина и просторно планирање, иако беа поканети.

На крајот беше потпишан меморандум за соработка за борба против уништувањето на урбаното зеленило. Претставници на невладините организации, активисти и експерти се заложија за борба против урбанистичката и градежната корупција.

Потсетуваме дека измените во Законот за урбанистичко планирање, кои беа изгласани без расправа и по скратена постапка на 13 август 2024 година, предизвикаа бурна реакција кај еколошките организации.

Уште пред да се изгласаат измените тие имаа критики за законот, а по усвојување побараа од претседателката да не го потпишува законот.

Една од забелешките што ја имаа еколошките организации беше дека зеленилото и парковите ќе бидат првата жртва.

Инаку, според една aнкета на Зелениот институт од 2023 година во врска со пристапот до јавни зелени површини, 37 проценти од 150 испитаници одговориле дека живеат на помалку 50 квадратни метри зеленило.

Извор: МЕТА