Лајпциг: Истражителите пронашле уште еден дрон и експлозив

Минаа речиси три недели откако на аеродромот во Лајпциг беше пронајден дрон со експлозив. Според истрагата,  дронот требало да нападне украински товарен авион од типот „Антонов“  што се користи за транспорт на воена опрема. Нападот не успеа бидејќи детонаторот очигледно бил дефектен. Службениците за државна безбедност од германската сојузна полиција по налог на генералниот јавен обвинител Јенс Ромел, сега  ги истражуваат околностите на нападот,  како бил замислен и кој е одговорен за него.

Трет дрон пронајден на поле

Според информациите, истражителите во моментов поаѓаат од тоа дека не бил користен само еден, ами неколку дронови. Првиот бил пронајден на аеродромскиот простор, вториот дрон можеби се судрил со авион на ДХЛ. Третиот дрон – а, за него до сега не се знаело – бил пронајден на поле во Кабелскетал, област во округот Залекрајс во сојузната покраина Саксонија-Анхалт во  Германија, која граничи непосредно на западниот дел од аеродромот во Лајпциг, наведуваат од безбедносни извори. Портпаролката на Сојузното обвинителство во понеделникот одби да даде коментар. Според информации од безбедносни извори, форензичките техничари на сојузната полиција пристигнале на местото на настанот на 14 август, заедно со други полициски сили. Следниот ден истражителите наводно откриле супстанца при која според првичните проценки може да се работи за околу 50 грама високо-експлозивен воен експлозив хексоген. Сторителите можеби имале намера да извршат многу поголем напад отколку што до сега е познато.

Инцидентот на колизија со дрон

Покрај првиот дрон, кој беше пронајден на аеродромот околу 23:42 часот ноќта на 4 август, се верува дека втор дрон се судрил со товарен авион на ДХЛ кратко потоа, околу 00:03 часот. Поради итното затворање на аеродромот по откривањето на првиот дрон, авионот морал да го прекине слетувањето во Лајпциг. Авионот очигледно се судрил со дронот со брзина од неколку стотици километри на час во близина на оградата на аеродромот. Неколку секунди пред судирот, пилотите наводно забележале објект со големина од околу 30 сантиметри. Анализата на радарската слика подоцна покажала присуство на мал летачки објект. По судирот, авионот на ДХЛ бил пренасочен кон Хановер, каде што истражителите го прегледале на аеродромот и спровеле распит на екипажот. Притоа се откриени оштетувања на опашката на авионот, што укажува на колизија.  Истрагата заклучила дека инцидентот не бил од судир со птица.

Пронајдени се сомнителни антени и електроника

До сега не е пронајден дронот или делови од него. Според проценките на истражителите, леталото може и да било вовлечено во моторите по судирот и расцепено на најситни парчиња. Во Курсдорф, северно од аеродромот во Лајпциг, истражителите обезбедија дел од техничка конструкција што можеби се користела за управувањето со дронот – антена и друга електроника прикачени на дрво со леплива лента. Недалеку од местото, се најдени изгорена земја и метални фрагменти. Истражителите сметаат дека тоа би можело да биде местото на детонацијата. Сведоци пријавиле дека чуле силен звук во 19:20 часот, неколку часа пред  откривањето на дронот на аеродромот.

Безбедносни кругови се сомневаат во руските разузнавачки служби

Што точно експлодирало таму, дали станува збор за несреќа и дали сторителите сакале да уништат докази, сè уште се истражува. На 11 август полицијата открила компоненти на дрон, мотор и ротор, при повторното пребарување на областа, наведуваат ВДР, НДР и Зиддојче цајтунг. Од извори блиски до истрагата првично беше наведено дека ништо не било пронајдено за време на ова пребарување. Нејасно е како бил замислен нападот и кој би можел да стои зад него.  Безбедносни извори  поаѓаат од тоа дека руски разузнавачки служби биле вклучени во планирањето на нападот.  Русија  јавно отфрли било каква одговорност за инцидентот. Истражителите моментално следат неколку траги, меѓу другото и од прибран ДНК материјал.

Извор: DW