Лавина реакции за ПР злоупотреби на трагедијата во Кочани

Лавина реакции во Србија и во Македонија предизвикаа посетите на политичарите на болничките соби, каде што се лекуваат тешко повредените од пожарот во дискотеката во Кочани.  Српскиот претседател Александар Вучиќ со толпа новинари и камери влезе во болничките соби и го навлече револтот на граѓаните кои му порачаа дека повредените од Македонија се дојдени на лекување во Белград, а не за ПР на грбот на оваа трагедија. Во посета на повредените во Скопје, Кочани, но и во Солун деновиве се и претставници на македонската влада. Но, премиерот Христијан Мицкоски тврди дека целта не е „да прави ПР, туку за да излезам пред вас, да не се кријам и да зборувам отворено за сето она со кое се соочуваме“.

ПР и во моменти на тага

Тешко повредени деца, со завои на лицето и телото лежат во болнички кревети. Околу нив медицински лица со маски будно ја следат нивната здравствена состојба. На само неколку чекори од болничкиот кревет десетици новинари и нивните камери и фотоапарати се насочени кон политичарите коишто тргнаа во обиколка на болничките соби, каде се лекуваат тешко повредените во катастрофалниот пожар во клубот во Кочани. Вакви фотографии осамнаа на профилите на социјалните мрежи на српскиот претседател Александар Вучиќ кој ги посети повредените од Македонија, коишто заминаа на лекување во Белград.

Додека едни се заблагодаруваат на подадената рака и лекарска помош, други остро го нападнаа ваквиот ПР потег на Вучиќ, кој донесе десетици репортери, фоторепортери и сниматели во една од собите со тешко повредени млади луѓе. „Срам да ти е Вучиќ! Немаш тронка достоинство! Од каде имаш право да сликаш луѓе, болни во завои, заради самопромоција! Срам за тебе и за целата твоја придружба!“; „Повредените ги пративме да ги лекувате, а не да правите ПР“, реагираа граѓаните на социјалните мрежи и во Македонија и во Србија.

„Ги запазив протоколите“

Еден ден подоцна и македонскиот премиер Христијан Мицкоски информираше дека ги посетил пациентите повредени во пожарот во Кочани, коишто се хоспитализирани во Скопје. „И вчера и денеска посетив пациенти повредени во пожарот во клубот ‘Пулс’ во Кочани“, изјави Мицкоски пред новинарите.

На прашањето според кои протоколи е тоа дозволено и дали има последици врз здравјето на пациентите со оглед дека не е дозволена посета ниту на семејството, тој одговори дека ги запазил сите протоколи побарани од медицинскиот персонал и докторите.

„Нема да видите лице, ниту да слушнете и прочитате име на пациент којшто јас сум го посетил. Ќе ги погледнете сите слики, ќе видите како јас сум влегол“, рече Мицкоски пред болницата „8-ми Септември“.

Владината служба на социјалните мрежи и на профилот на Владата, но и на премиерот Мицкоски објави фотографии од најновата посета, но само од средбите со медицинските лица во болничките ходници.

И во понеделникот Мицкоски ги посети повредените од трагичниот пожар во Кочани и присуствуваше на состанокот на кризниот штаб на Министерството за здравство. Тогаш беа објавени фотографии на социјалните мрежи и од посетата на болничките соби.

„Внимававме какви фотографии објавуваме“

Мицкоски вели дека „има и такви коишто влегуваа со камери и слично“, но дека тој никаде не влегол со камери и нема намера да прави ПР од сето ова. „Фотографиите се во тил, нема ниту едно лице, многу внимателно ги биравме фотографиите за да нема ниту едно лице. Не го правам тоа поради ПР, туку го правам за да излезам пред вас за да не се кријам и за да зборувам отворено за сето она со кое се соочуваме“, вели Мицкоски.

Но, ако е тоа проблем, подготвен сум да сносам одговорност, додаде премиерот. Тој смета дека неговата задача е преку медиумите да се обрати со пораки до граѓаните, кои се важни.  „Тоа е мојата цел“, повтори Мицкоски.

Тој на дел од новинарите им се обрати со зборовите: „Не мора ништо да објавувате од ова што го зборувам, не мора да објавувате ни една слика, ниту еден статус. Но, оставате ми да си ја работам работата“.