Штип и оваа година традиционално ќе биде центар на македонската забавна музика. На 30 и 31 октомври, градот ќе биде домаќин на 41. издание на реномираниот фестивал на забавни мелодии „Макфест“.
Повеќе од четири децении, овој фестивал претставува место на кое се среќаваат различни музички генерации, се промовираат нови композиции и се создаваат песни кои продолжуваат да живеат и по завршувањето на фестивалските вечери.
Нова сцена и континуитет на традицијата
Овогодишното издание носи нови музички содржини и авторски остварувања зад кои стојат докажани имиња од домашната музичка сцена. Градоначалникот на Општина Штип, Иван Јорданов, истакна дека градот повторно ќе биде во знакот на културните случувања.
„Фестивалот претставува значаен белег на градот, но и важен дел од македонската музичка традиција, кој со децении ги обединува музичките имиња, публиката и љубителите на македонската забавна музика“, посочи Јорданов.
Во поглед на целокупниот изглед, оперативниот координатор Александар Арсовски најави големи измени во визуелниот дел на фестивалот, како и целосно нова сцена која ќе биде нешто поразлично од сè она што публиката го гледала досега. Уметничкиот директор Роберт Саздов потенцираше дека програмата е одлична, со неколку учесници кои за првпат ќе настапат, но и со истакнати македонски музички имиња кои ќе бидат дел од фестивалот.
Листа на изведувачи: Простор за дебитантите и враќање на старите ѕвезди
Првата фестивалска вечер е резервирана за нови композиции. На сцената ќе се претстават Анастасија Спасевска, Драгана Јовановска, Девана, Kaly и Гоки, Санела Шукриевска, Ненад Вржалски, Три пати на ден, Дорис Ди, Арте-Факт, Ана Цамбулева, Доно, Тамара Грујеска, Теа Златева, Марија Наумоска и Елена Наумова.
Втората вечер ќе донесе настапи на добро познатите ѕвезди на македонската естрада. Пред публиката ќе настапат Огнен Здравковски, Врчак и Симона Поповска, Елвир Мекиќ, Јован Јованов и Тони Зен, Ристо Самарџиев, Агни Авшар, Наташа Малинкова, Викторија Лоба, Thea Trajkovska, Давид Темелков, Марија Спасовска и Марија Данева.
Прочитајте повеќе музички вести и извештаи од настани во рубриката „Магазин“ на Публикум.
ПУБЛИКУМ Вистината на прво место