Манев: Палевски треба да го прашате зошто ги уби Вања и Панче

Судењето за убиството на Вања и Панче денеска во Основен Кривичен суд Скопје продолжи со испитување на обвинетиот Велибор Манев. Тој одговараше на прашањата на бранителите на останатите обвинети и истакна дека причината за убиството на Вања и Панче е прашање кое треба да го одговори Љупчо Палевски.

Во однос на прашањата од бранителот на таткото на Вања, адвокатот Владимир Туфегџиќ, за планирањето на грабнувањето, Манев изјави дека Љупчо Палевски предложил потенцијални цели, вклучувајќи директор на „Гранит“ или ќерка на фармацевт, пишува НоваТВ. 

„Десет дена пред грабнувањето, Палевски рече дека ќе ја набљудува жената за да ги дознае нејзините навики“, изјави Манев, и додаде дека личноста од фотографијата и Вања наликувале.

„Покрај самиот изглед, времето на излегување 7:20 наутро, секојдневно како што следел дека излегува, бевме сигурни дека тоа е таа особа“, рече тој.

Кога ја откопчале вреќата Манев сфатил дека киднапирале дете.

„После убиството, вечерта 27 ноември беше последно излагање во партија кога однесов тегли мед за еден пријател, требаше да си ги подигне од партијата, немав никаков контакт со никој, освен со Боре и првиот контакт беше 30 ноември кога прв пат ми се јави Љупчо Палевски за да ми каже дека заминува за Москва, па после 15 минути да се прејави да ми каже дека заминува за Турција. Со Кешишев немав воопшто контактирано после тоа“, рече тој.

На прашање кој одлучувал кој ќе биде грабнат, Манев повторно го посочи Палевски.

„Тој ги знаеше луѓето во зградата и одлучуваше кој ќе биде грабнат“, кажал Манев, а пренесува медиумот Сакам да кажам. 

Во однос на прашањата за вмешаноста на таткото на Вања, Александар Ѓорчевски, тој одговори дека таткото прв пат му бил посочен во полициската станица, и напомена дека бил малтретиран од полицијата за да каже дека видел како Љупчо Палевски разговара со таткото на Вања.

Прашан дали тој лично слушнал и видел дека Љупчо Палевски телефонски разговара со таткото Александар, одговори не.

Адвокатот Маријан Витановски го откажа полномоштвото за бранење на Љупчо Палевски-Палчо, обвинет за убиството на Вања и Панче.

Палевски продолжува да го брани адвокатот Јовица Страшевски.

Извор: МЕТА