Мерц: Рускиот напад врз Суми е воено злосторство

По рускиот напад врз украински град Суми во источниот дел од земјата во кој загинаа најмалку 34 лица, бурата од гнев продолжува со несмалено темпо. Американскиот претседател  Доналд Трамп  во неделата зборуваше за „ужасна работа“.

„Мислам дека е страшно“,изјави Трамп за време на летот во авионот „Ер Форс 1“. „Ми рекоа дека направиле грешка. Но, мислам дека тоа е страшна работа. Мислам дека целата војна е ужасна работа”. Портпаролот на Советот за национална безбедност Брајан Хјуз изјави дека ракетниот напад е „јасен и брутален потсетник“ дека се потребни преговори „за да се стави крај на оваа ужасна војна“.

Ниту Трамп, ниту Белата куќа не ја спомнаа Русија поименично во критиките. Сепак, американскиот државен секретар Марко Рубио претходно изрази сочувство за „жртвите на денешниот ужасен руски ракетен напад врз Суми“.

Напад со балистички ракети

Според украински извори, руската армија истрелала две балистички ракети врз Суми, кој се наоѓа недалеку од границата. Според спасувачите во градот, најмалку 34 лица загинале, а други 117 се повредени во нападот извршен во неделата, меѓу кои 15 деца.

Нападот се случи два дена откако американскиот специјален пратеник Стив Виткоф се сретна со рускиот претседател Владимир Путин, но засега ништо не е соопштено за резултатите од разговорите.

Генералниот секретар на ОН Гутереш ја изрази својата „длабока загриженост и шокираност“ и укажа на „уништувачки модел на слични напади врз украинските градови во последните недели“. Нападите врз цивили се „забранети според меѓународното хуманитарно право“, нагласи тој.

Лидерот на германската ЦДУ и веројатен иден германски канцелар,  Фридрих Мерц за јавниот сервис АРД изјави дека тоа е „очигледно сериозно воено злосторство“. Биле извршени два брана на напади, а вториот дошол „кога помагачите се обидувале да им притекнат на помош на погодените. Ова е врв на перфидноста“. Тој предупреди на наивност во односот со Путин: „Ова им го прави Путин на оние кои со него зборуваат за прекин на огнот“.

Суми е под засилен руски оган неколку недели откако руските сили ја потиснаа украинската војска од соседниот руски регион Курск. Градот, кој се наоѓа на околу 50 километри преку границата, претходно беше поштеден од тешки руски напади.

Зеленски го покани Трамп во Украина

Украинскиот претседател  Володимир Зеленски сега го повика Доналд Трамп да отпатува во Украина за да се увери во уништувањето предизвикано од руската агресивна војна. „Сакаме да дојдете да го видите ова“, рече Зеленски во интервјуто емитувано на Си-Би-Ес, обраќајќи му се на американскиот претседател. Ако Трамп ја посети Украина, би разбрал „што направи Путин“.

По почетокот на својот втор мандат, Трамп првично даде јасни сигнали на приближување кон Русија и иницираше разговори со украинските и руските претставници во Саудиска Арабија. Сепак, пред  посетата на Виткоф на Москва,  тој го повика Кремљна поголема пресретливост. Шефот на Кремљ,  Владимир Путин  претходно го отфрли предлогот за безусловен прекин на огнот во Украина.

Зеленски во врска со тоа изјави: „Путин никогаш не сакаше да ја заврши војната. (…) Тој сака целосно да не уништи“. На прашањето дека него Трамп го нарекува „диктатор“ и ја обвини Украина дека е одговорна за војната, украинскиот претседател оцени дека „руската гледна точка“ преовладува во САД. Ова е показател за огромното влијание на Русија врз американската политика.