ПУБЛИКУМ Вистината на прво место
Од Бања Лука до Белград, од Белград до Тел Авив и меѓународната конференција за антисемитизам и конечно во Москва, ова е рутата по која претседателот на Република Српска, Милорад Додик, по кого Судот на Босна и Херцеговина распиша потерница, во последните неколку дена сосема слободно се движи. И покрај границата и Граничната служба, Додик синоќа се јави од Москва, со подолга порака од онаа мистериозната пред два дена – „стигнав“.
„Пристигнав во Москва. Секој престој овде го започнувам со посета на споменикот на Непознатиот јунак за да им оддадам почит на 28-те милиони Руси кои загинаа во Втората светска војна“, напиша Додик на мрежата „Икс“ и стави крај на шпекулациите кои со денови ги полнеа насловите на медиумите, од тоа дали е сѐ уште во Израел, во Белград или Бања Лука.
Состанок со Путин?
„Повторно ќе бидам овде на 9 мај на покана на претседателот на Руската Федерација, Владимир Путин, за да ја одбележам 80-годишнината од победата над фашизмот“, рече Додик, истакнувајќи дека има обид за ревизија на историјата кога станува збор за страдањата на рускиот, српскиот и еврејскиот народ за време на Втората светска војна. Тој го искористи токму тој контекст за да ја изрази својата поддршка за Русија и, пред сè, за претседателот Путин, кого го нарекува „историски лидер“ кој „прв започна борба против глобалистичката елита“ за да ја одбрани „самостојноста и независноста на Русија“.
Додик денеска треба да се сретне со Путин.
Подготовките за оваа средба траат долго, а аналитичарите во овој обид ја увидоа намерата на Додик да добие поддршка за политичките потези што моментално ги прави во Босна и Херцеговина, но и преку Путин да се обиде да ја омекне американската политика кон Република Српска. Додик во својата порака од Москва се осврна и на Америка, пофалувајќи ја политиката на Владимир Путин.
„Издржа сè и дојде во ситуација да пречека уште еден пандан кој му е важен во борбата против глобалистичката елита, а тоа е американскиот претседател Доналд Трамп“, напиша Додик.
Институциите (не) функционираат
Иако дискусиите траеја и претходните денови, сега во БиХ сериозно се прашуваат дали функционираат институциите на државата, односно дали границата „функционира“ и дали некоја полициска агенција во БиХ може да ги спроведе наредбите на Судот на Босна и Херцеговина.
Во овој контекст, стигна коментарот на бошњачкиот член на Претседателството на БиХ, Денис Беќировиќ, кој побара од институциите да си ја завршат работата. Доколку тоа не се случи, тој повикува на одговорност.
„Системот и властите мора да одговараат, секој за својот дел од одговорноста. Значи, дури и оние кои се одговорни за такви работи, а земаат плата за да си го завршат својот дел од работата, мора да дадат прецизни одговори на државата или да поднесат оставки, за да може некој друг да го направи тоа наместо нив“, експлицитно рече Беќировиќ.
Во исто време, нема информации од правосудните институции, ниту Граничната полиција се огласува околу преминот на границата од страна на Милорад Додик, како што немаше конкретни информации ни за претходното преминување на границата на претседателот на Народното собрание на РС, Ненад Стевандиќ, по кого исто така е распишана потерница, како и за премиерот на РС, Радован Вишковиќ.
Во меѓувреме по Додик и Стевандиќ е распишана меѓународна потерница, чие активирање треба да го потврди централата на Интерпол во Лион. По распишувањето на меѓународната потерница, и Србија и Унгарија поднесоа жалба до Интерпол, во која се наведува дека тоа е политички мотивиран потег, а официјалните лица во Бања Лука, како и адвокатскиот тим на Милорад Додик, очекуваат потерницата да биде отфрлена токму поради нејзината политичка конотација.
Уште една потерница?
За да се спречи ваквата одлука на Интерпол, Судот на Босна и Херцеговина активира уште еден случај во врска со Милорад Додик, овој пат за измама при купување на вила во Белград во 2007 година, во која била вмешана тогашната Павловиќ банка. Додик, кој Судот го повика на рочиште на 2 април, е осомничен за кривично дело перење пари во врска со кривичните дела примање подароци и други облици на корист и злоупотреба на положбата. Доколку не се појави, се претпоставува дека повторно ќе биде распишана меѓународна потерница во која Интерпол нема да може да се повикува на политички причини.
Додик тврдеше дека вилата е платена со пари од кредит од банката Павловиќ, а медиумите објавија дека парите биле повлечени дури една година по купувањето, а барањето за заем е заверено со печат на владата на Република Српска, на чие чело тогаш беше Додик. Интересно е тоа што и Обвинителството на Србија формираше предмет поврзан со купување на вила во населбата Дедиње во Белград, како што сметаат експертите, за да се избие адутот на Судот на Босна и Херцеговина доколку процесот се води пред српското правосудство.
Додик е осомничен за напад на уставниот поредок на БиХ поради одлуките што следеа откако Судот на Босна и Херцеговина го осуди на една година затвор и шестгодишна забрана за политичка активност поради непочитување на одлуките на високиот претставник. Тој е недостапен за босанскохерцеговските институции за спроведување на законот, кои не постапија по налогот на Судот на Босна и Херцеговина за приведување, поради потенцијалниот ризик од конфронтација меѓу членовите на Државната агенција за истрага и заштита (СИПА) и припадниците на МУП на РС.
