СДСМ: Дали Обвинителството се врати од екскурзија или само Мицкоски работи во Обвинителството?

Социјалдемократскиот сојуз на Македонија упати остри критики до Јавното обвинителство, обвинувајќи го за свесно игнорирање на сериозни случаи на корупција и загрозување на здравјето на граѓаните.

Според портпаролката Богданка Кузеска, институцијата со месеци не презема ништо по однос на доставените докази против функционери на власта, додека обвинителите експресно се будат и постапуваат единствено тогаш кога премиерот Христијан Мицкоски ќе најави кој треба да биде гонет.

Милионски тендери во фиока и двојни аршини

Опозициската партија потсетува дека поминаа девет месеци откако нивниот антикорупциски тим достави кривични пријави и докази за сомнителни тендери вредни над 100 милиони евра, на кои неодамна се надоврза и скандалот со новите договори од 1,5 милиони евра во Министерството за дигитална трансформација. Наместо истрага, овие предмети очигледно се чуваат во фиока, додека кривичната пријава против самиот Мицкоски беше експресно отфрлена, што според партијата е класичен пример за двојни аршини во правдата.

Игнорирање на скандалите во Гостивар и партиските злоупотреби

СДСМ јавно прашува до каде е постапката за масовното труење со вода во Гостивар, каде што над 5.000 граѓани завршија во болница. Иако е поднесена кривична пријава против министерот за здравство Сашко Клековски и други раководни лица, досега никој не е повикан на распит за овој скандал.

Дополнително, институциите молчат и за физичкиот напад врз младите активисти во Ново Село кои ја говореа вистината за водата, како и за скандалозниот случај каде што доверливи полициски документи завршија директно во партискиот штаб на ВМРО-ДПМНЕ. Од СДСМ децидно порачуваат дека Обвинителството мора да почне да ја работи својата работа за да се заштитат народните пари и безбедноста на граѓаните, наместо да чека телефонски насоки од премиерот.

Следете ги сите актуелни политички реакции во рубриката „Партиска хроника“ на Публикум.