Молк во Град Скопје и „Водовод и канализација“ за исклучувањето на водата, во болниците ќе се оперираат само итните пациенти

По најавите дека во сабота главниот град ќе остане без вода, надлежните во град Скопје, односно во јавното претпријатие „Водовод и канализација“, не одговараат на прашањата на Мета.мк кои многумина си ги поставуваат – колкав период ќе нема вода, како и кои точно интервенции ќе се прават во водоводната мрежа.

Граѓаните во паника купуваат вода од маркетите, реагираат на социјалните мрежи, прашуваат колкав период ќе останат без вода, но сепак, одговорните ниту објавија официјално соопштение на нивната веб-страница ниту пак свикаа прес-конференција на која би дале подетални информации за да се намали загриженоста. Сите официјални информации за наводното исклучување на водата во главниот град се базирани на една Фејсбук објава на ЈП „Водовод и канализација“. Оттука, бројот на шпекулации на социјалните мрежи, медиумите, особено интернет порталите, во однос на ова прашање е драстично зголемен.

Директорот на „Водовод и канализација“, Тони Миновски, денеска не одговараше ниту на нашите телефонски повици ниту на пораките. Во врска со овој проблем, не добивме одговори ниту на прашањата испратени на официјалната е-адреса на јавното претпријатие, а одговори, Мета.мк, веќе некое време не добива ниту од градските власти.

Миновски е петти в.д. директор на ЈП „Водовод и канализација“ Скопје кој го поставува градоначалничката Данела Арсовска од почетокот на нејзиниот мандат. Најпрво на таа функција беше сегашниот министер за локална самоуправа од редовите на ВМРО-ДПМНЕ, Златко Перински. Тој влезе во јавни препукувања со Арсовска, па на негово место беше поставен Маријанче Митовски. По Митовски, Данела го именуваше за в.д. директор Драган Илиевски, а по Илиевски следуваше Виктор Панчевски. По само шест месеци на функцијата, Виктор Панчевски беше заменет со Тони Миновски.

Болниците се подготвуваат за најавенито прекин на снабдувањето со вода

Она што се наметнува како прашање во вакви ситуации е како ќе функционираат училиштата, градинките, болниците. Според единствената најава на Фејсбук од 15 декември, водата ќе биде исклучена во сабота, а тој ден училиштата и градинките не работат. Во однос на функционирањето на болниците и клиниките, се обративме во Министерството за здравство, од каде што велат оти се подготвуваат.

Така, од Службата за општи и заеднички работи при клиниките информираат дека се „во тек подготвителни активности за непречено функционирање на клиниките при прекинот на снабдувањето со вода“.

„За греење ќе се користат резервните резервоари. Службата ќе препорача клиниките да ги презакажат елективните интервенции. Останатите ресурси од тип на медицински гасови, електрична енергија, канализација, климатизација ќе функционираат вообичаено“, велат во министерството.

Директорот на Универзитетската клиника по хируршки болести „Св. Наум Охридски“, д-р Небојша Настов, посочува оти и тие, заедно со Градската општа болница „8 Септември“ и клиниките, се подготвуваат да работат непречено во време на криза. Како што додава тој, ним водата им е најпотребна за стерилизација на инструменти и за перење.

„Ние знаеме дека во петок на полноќ ќе снема вода, и дека ќе нема и следниот ден, до попладневните часови. Имаме разработено неколку варијанти, имаме протоколи според кои се организираме во време на криза. Елективни операции и онака нема за време на викенд. Водата кај нас е потребна во најголем дел за стерилизација на инструменти и за перење“, вели д-р Небојша Настов.

„Ако ги потрошиме залихите на вода, ќе бараме помош од болници во најблиските градови“, вели директорот на клиниката „Св. Наум Охридски“, д-р Небојша Настов.

Целата фама и паника околу исклучувањето на водата во Скопје започна откако медиумите почнаа да пишуваат за дефектот во Карпош 4 на улицата „Никола Парапунов“, каде точно две седмици стотици метри кубни питка вода истекува директно во канализација.

Паника и неизвесност кај населението

Една од првите објави за овој дефект беше на веб-страницата на Мета.мк на 11 декември. Тогаш објавивме дека веќе 5 дена питка вода „извира“ поради пукната цевка на оваа улица. И тогаш, надлежните од ЈП „Водовод и канализација“ не одговорија на нашите прашања во врска со овој дефект. Откако повеќе други медиуми почнаа да објавуваат за случајот, после четири дена, односно на 15 декември, од јавното претпријатие излегоа со веќе споменатата објава на нивната Фејсбук страница. Тогаш за прв пат информираа дека подготвувале „сложен оперативен план за санација на дефектот“ и дека поради овој дефект во сабота, на 21 декември ќе мора да се сопре водата во главниот градски цевковод.

Имено, од Водовод тврдеа дека покрај дефектот на ул Никола Парапунов, кој е на цевка со дијаметар од 700 мм, ќе санирале уште три други дефекти на главниот цевковод со дијаметар од 1600 мм на потегот од кружниот тек во Ѓорче Петров до раскрсницата меѓу булеварот Партизански одреди и улица „Никола Парапунов“.

Како маркетиншки елемент кој би го оправдал молкот на јавното претпријатие и градот Скопје, тие го посочија наводниот факт оти „затварање на вода на главниот градски вод Ф1600мм се прави еднаш на педесет години, а последно такво затварање било 1991/1992 година за реализација на водоводен приклучок на бунарското подрачје Лепенец“.

Но, ваквото тврдење е манипулација која уште повеќе ја усложнува ситуацијата. Имено, факт е дека на 10 февруари годинава, ЈП „Водовод и канализација“, исто така на Фејсбук, најави затворање на водата за цело Скопје поради наводна интервенција на главната водоводна цевка Ф1600мм во Рашче.

Повеќе часови подоцна, истиот ден, од Водовод испратија соопштение до медиумите оти „неовластени лица“ објавувале „неточни и непроверени информации“ на нивната Фејсбук страница. Тие негираа оти ќе биде сопрена водата. Но, веќе беше доцна, голем дел од граѓаните веќе имаа набавено вода за пиење и имаа наполнето резерви на вода за следниот ден.

За во сабота, од ЈП „Водовод и канализација“ во нивната Фејсбук објава посочија оти нивниот „оперативниот план и затварање на вода во главниот градски цевковод Ф1600 е планирано да отпочне од 21 декември, а ќе трае до завршување на интервенцијата“.

Од друга страна, во анонимна изјава за дел од медиумите, од Водовод посочиле дека зафатот ќе почнел во петок, на 20 декември во 22 часот, и вода ќе имале жителите на Чаир, Бутел, Радишани, Пластичарска до Американска амбасада, Визбегово, Бардовци, Железара, Автокоманда висока зона, Ѓорче Петров од СП Планет, Сарај, Шутка, Топанско поле, Новоселски пат, населба Даме Груев, Кисела Јабука, Стопански двор, Волково и Орман.

Градоначалничката Арсовска, пак, за време на друг настан одговарајќи на новинарско прашање посочи дека санирањето на дефектот „нема да трае ништо повеќе од една редовна санација на кој било декефт кој што го имаме во градот“. Во следната реченица таа повика да не се прават политички поени на сметка на исклучувањето на водата ниту да се шири неизвесност и страв меѓу населението. На крајот поентира оти мисли дека „апсолутно ќе биде завршено во текот на едно деноноќие“.

Извор: МЕТА