„На чекор од правдата“ – студентите од Белград тргнаа пеш кон Нови Сад

Студентите во блокада во Србија утрово од Белград тргнаа пеш кон Нови Сад под слоганот „На чекор од правдата“, пренесува српски „Данас“.

Првата пауза студентите ја направија на Академијата за криминалистичка полиција, каде одржаа 15-минутен молк, по што продолжија кон Батајница, каде повторно ќе прават пауза.

Граѓаните од околу ѝ аплаудираа и скандираа на студентската колона и ги поздравуваа студентите од своите тераси.

Српскиот вицепремиер и министер за внатрешни работи Ивица Дачиќ изјави дека припадниците на МВР целосно ќе ја обезбедат трасата на студентскиот марш, кој треба да заврши утревечер пред железничката станица во Нови Сад.

Сообраќајот на трасата ќе биде запрен и пренасочен, а пред и зад конвојот се распоредени припадници на сообраќајната полиција и одделението за јавен ред, како и амбулантни возила и цистерни за вода.

Втората група студенти од Белград кон Нови Сад ќе се упати утре, на покана на студентите од Електротехничкиот факултет. Целта е на 1 февруари да им се придружат на своите колеги во Нови Сад во блокадата на три моста, што ја организираат по повод три месеци од падот на настрешницата.

Во меѓувреме, Врховното јавно обвинителство во Србија соопшти дека јавните обвинителства ги исполниле барањата поднесени од студентите што протестираа пред институцијата на 25 декември и додаде дека врховната јавна обвинителка Загорка Доловац сè уште стои на нејзиниот повик за средба со претставници на студентите, со цел да се разјаснат одредени барања и да се обезбедат дополнителни информации.

Инаку, на социјалните мрежи се шири говорот на деканот на Факултетот за драмски уметности во Белград, Милош Павловиќ, од неговото гостување на Радиотелевизија Србија (РТС) во кое на новинарот му порача дека телевизијата нема доверба од студентите.

„После 60 дена првпат сум на оваа телевизија, некои од студентите првпат се на оваа телевизија и само се прашувам зошто студентите на мојот факултет кои ја иницираа блокадата никогаш не биле поканети во РТС“, вели Павловиќ.

„Сега имам можност да кажам дека студентите не се странски платеници. Да, на пример, црвената рака не е симбол на Хамас. Секој што е сериозен новинар нека погледне на Гугл и да види кои се симболите, а не само да пријави една реалност. До пред една недела ексклузивно известувавте за една реалност“, му рече професорот на новинарот на РТС, Зоран Станојевиќ.

Говорот на професорот се шири на социјалните мрежи, бидејќи тој им одржа лекција на новинарите и уредниците на РТС за професионалното известување, кое е законски обврзувачко за националната телевизија, пишува Данас.

Извор: МЕТА