Над 6.000 жртви по земјотресите во Венецуела

Повеќе од еден месец по разорниот двоен земјотрес што ја погоди Венецуела, досега не е расчистена ниту четвртина од урнатините. Во меѓувреме,  бројот на жртвите продолжува да расте, а илјадници лица сè уште се водат како исчезнати.

Повеќе од пет недели по катастрофата, бројот на загинати ја надмина следната илјадарка. Според официјалните податоци, животот го загубиле вкупно 6.125 лица, соопшти претседателот на Националното собрание, Хорхе Родригез.  Отстранувањето на урнатините, сепак, е далеку од завршено.

Според Родригез, кој е брат на вршителката на должноста претседател, Делси Родригез, досега се расчистени 346.000 тони урнатини. Тоа претставува околу 16,5 проценти од вкупните 2,1 милион тони шут што, според проценките на Програмата за развој на Обединетите нации (УНДП), биле создадени од земјотресите.

Во катастрофата биле оштетени повеќе од 800 објекти, а дел од нив целосно се урнале.

Илјадници луѓе сè уште се водат за исчезнати

Се очекува бројот на загинати и понатаму да расте. Сепак, официјален број на исчезнати лица засега не е објавен.

Друга платформа, „Venezuela Te Busca“ („Венецуела те бара“), наведува дека се трага по речиси 17.800 луѓе.

Штета од речиси 20 милијарди долари

Земјотресите со јачина од 7,2 и 7,5 степени ја погодија Венецуела на 24 јуни.

Според проценките на Светска банка, тие предизвикале непосредна материјална штета во вредност од речиси 20 милијарди американски долари. Речиси половина од оваа штета се однесува на станбените објекти.

Најтешко погодени од разорните потреси биле сојузната држава Ла Гуаира и главниот градски округ Каракас.

Извор: DW