ПУБЛИКУМ Вистината на прво место
Осомничен за нападот е 50-годишен саудиски доктор кој се преселил во Германија во 2006 година. Тој бил уапсен кратко по нападот, околу 19 часот во петокот
Автомобил влета во насобраните луѓе на божиќен панаѓур во источо германскиот град Магдебург во петокот вечерта, од што загинаа најмалку две лица и уште најмалку 60 се повредеени.
Возачот беше уапсен кратко по инцидентот, кој се случи околу 19:00 часот кога панаѓурот беше полн со купувачи, објави агенцијата Асошиејтед прес.
„Осомничениот е 50-годишен саудиски доктор кој се преселил во Германија во 2006 година“, изјави Тамара Циешанг, министерка за внатрешни работи на државата Саксонија-Анхалт. Тој практикувал медицина во Бернбург, на околу 40 километри јужно од Магдебург.
„Како што стојат работите, тој е единствен извршител, така што, колку што знаеме, нема понатамошна опасност за градот“, изјави гувернерот на Саксонија-Анхалт, Рајнер Хаселоф, пред новинарите.
Петнаесет од повредените се многу сериозно повредени, според владините официјални лица и веб-страницата на градските власти.
Германската новинска агенција ДПА, објави снимка од очевидци на која се гледа апсењето на осомничениот. Полициски службеник го имаше вперено своето оружје кон осомничениот и му се обраќаше додека тој лежеше на земја. Наскоро пристигнаа и други полициски службеници за да го одведат во притвор.
Двете лица кои се потврдени како загинати се возрасен маж и малолетник, но официјалните лица не исклучуваат и дополнителни смртни случаи бидејќи 15 лица се тешко повредени.
Насилството се случи во Магдебург, град кој се наоѓа западно од Берлин и е главен град на Саксонија-Анхалт со околу 240.000 жители. Пред осум години исламистички екстремист влета со камион во преполн божиќен панаѓур во Берлин, при што загинаа 13 лица, а многумина беа повредени. Напаѓачот беше убиен неколку дена подоцна во престрелка во Италија.
„Моите мисли се со жртвите и нивните роднини. Ние стоиме покрај нив и покрај народот на Магдебург“, напиша германскиот анцелар Олаф Шолц на социјалната мрежа.
По трагичниот напад, порака со сочувство и поддршка за германскиот народ изрази и македонскиот министер за надворешни работи, Тимчо Муцунски.
„Моите мисли се со жртвите на нападот на божиќниот пазар во Магдебург и нивните најблиски во овој тежок момент. Искрено посакувам брзо и целосно закрепнување на повредените“, напиша Муцунски на социјалните мрежи. „Стоиме во солидарност со Германија, потврдувајќи ја нашата посветеност на мирот, безбедноста и единството,“ додаде тој.
