НАТО повика 6.000 научници да помогнат во справување со пандемијата

Повеќе од 6.000 научници вмрежени со НАТО се повикани да бараат решенија за пандемијата на вирусот САРС-КоВ-2, кој ја предизвикува болеста Ковид-19. Повикот го упати главниот научник на Алијансата д-р Брајан Велс, главен научен советник на Северноатлантскиот совет.

Научниците, од кои повеќе од 5.000 работат со Организацијата на НАТО за наука и технологија (ОНТ), се повикани да дадат свој придонес, од научноистражувачки трудови до прототипи, чиј развој и изработка ќе бидат поддржани од Организацијата за наука и технологија.

Оваа агенција на НАТО има своја лабораторија, Центарот за поморски истражувања и експериментирање во Ла Специја, Италија, Канцеларија за поддршка на соработката во Париз, Франција и Канцеларија на главниот научник во штабот на НАТО во Брисел, Белгија.

Тоа е најголема мрежа на научници кои работат во сферата на одбраната и безбедноста во светот.

ОНТ ги повика научниците да работат на решенија за откривање на вирусот, зголемување на ситуациската свест, деконтаминација, отпорност, како и за периодот по пандемијата.

„’Предизвикот на главниот научник’ им е испратен на повеќе од 6.000 научници во мрежата на НАТО, кои се очекува овој месец да испратат предлози, од истражувачки трудови до прототипи. Во соработка со сојузниците, партнерите и персоналот, Канцеларијата на главниот научник ќе помогне најдобрите предлози да станат реалност“, најави д-р Велс.

Организацијата за наука и технологија има и класифицирана платформа за соработка каде што научници од сојузничките и партнерските земји соработуваат во справување со кризата, а Канцеларијата за поддршка на соработката ги координира релевантните истражувања, меѓу кои, во моментов, и развој на сценарија за итна медицинска нега, проекти за намалување на животниот век на вирусите преку употреба на полимерски слој на површини и ткаенини и ласерско тестирање на примероци од плунка.

Извор: МЕТА

Прочитајте повеќе

Болсонаро се криел во унгарската амбасада во Бразилија откако му бил одземен пасошот

Поранешниот бразилски екстремно десничарски претседател Жаир Болсонаро минатиот месец поминал две ноќи во унгарската амбасада …