ПУБЛИКУМ Вистината на прво место
Со потпирањето на мистика и езотерија како рамка на толкување на трагични настани, не само што се одвлекува вниманието од вистинските причини за несреќата во Кочани – употреба на пиротехника, организацијата на настанот, немање соодветни лиценци за работа, долга традиција на криминал, корупција и поткупливост, туку уште полошо, со ваквото толкување на нештата се поигрува со маката на семејствата кои ги загубиле своите деца и со големината на целата трагедија што ја снајде државата
Трагедијата во Кочани во којашто на 16 март во пожар згаснаа 59 млади животи – меѓу кои 6 деца, а повредени се 197 лица од кои 25 деца, ја трогна цела нација, државите од регионот, а и пошироко во Европа. Сите имаме право да тагуваме и да се справуваме со траорните емоции на свој начин, сѐ додека тоа „тагување“ не наштети на другите. Особено не ако се шират дезинформации и се дава објаснување на трагичниот настан преку псевдонаучна, езотерична и окултна интерпретација, пишува Вистиномер.
Таков е примерот со поткастот „Слободен свет“ на водителот Владимир Трајковски кој е поранешен член на партијата Родина и сегашен член на Македонска ера трета – суверенисти, кој разговора со уметникот Маријан Камиловски, автор на оградата на мостот кај Холидеј Ин направена во рамки на проектот Скопје 2014, вредна 2 милиони евра – пари од државниот буџет.
Во видеото тие зборуваат за трагичниот настан во кочанската дискотеката „Пулс“, што министерот за внатрешни работи Панче Тошковски ја нарече „штала“, и даваат прилично невкусен осврт на настаните. Не само заради начинот на кој зборуваат за причините што ја предизвикале оваа несреќа, проблематично е и времето кога е објавена содржината. Емисијата е емитувана по непоминати 24 часа од пожарот, кога уште не се знае ниту точната бројка на загинати и повредени, ниту нивната состојба.
Што беше кажано во емисијата?
Накратко, низ разговорот се споменуваат измислици, псевдонаука, езотерични толкувања за тоа зошто баш во Кочани се случи настанот – теми од „длабокото знаење“ како Алистер Краули, окултни одреди, заговори со англиската МИ6, но и не многу умешно се споменаа и „теоријата на струните“ (string theory), квантна биологија, итн. Во поткастот најнапред се прикажува објава на Фејсбук врз која понатаму Трајковски и Камиловски ја темелат речиси целата дискусија. Тие ја цитираат Мила Алексиќ, српска психијатарка која според колегите од Раскринкавање, е добро позната теоретичарка на заговори.
Приказната на Алексиќ, што Камиловски ја презема и ја реобјавува на својата Фејсбук сметка вели:
Во општеството има чудна атмосфера и има напнатост во воздухот. Што ова значи? Од гледна точка на езотериските учења високиот потенцијал е опасна состојба како за поединецот така и за колективот. За жал поради одсаството на овие знаења кај мнозинството луѓе ни се случи трагедија.
Имено, кога во непосредното соседство – Србија. се случува настан од екстремно висок ризик со висок потенцијал на негативен набој , паметно е да се одбегнуваат настани во кои лесно може да дојде до празнење на потенцијалот. Србија успеа да го изменаџира ивентот без посериозни безбедносни проблеми , но набојот остана и како злодух бараше погодно тле да се испразни . тоа се случи во кочани . можеше да се случи и било каде во околинава , но зошто кочани?
Кочани е комуњарско мафијашко дувло и затоа сдсм таму победуваат нон стоп . комуњарите се на сорос , протестите во србија се на сорос . набојот кој се створи, створи клатно или егрегор , кој во србија остана гладен , и како гладно животно продолжи да бара плен по околинава . како што кажав , кога клатното е гладно се храни со самото себе , со своите припадници и со тие кои им се во околин, преземено од Јутуб емисијата и од објавата на Камиловски.
Понатаму во емисијата (накај 48 минути и 40 секунди) се додава дека дополнителната причина зошто „набојот на негативна енергија“ се испушта токму таму е затоа што „Order Templi Orientis“ или Ред на источните Темплари (ОТО), кој наводно го има во три града (Скопје, Прилеп и Кочани), е најактивен во Кочани. Тие тврдат дека мистичните, таинствените активности на овој Ред довеле до поплавите во Стајковци, петкратното убиство кај Смилковското езеро, големиот скопски земјотрес во 1963 година, па дури и сличен пожар во шведскиот град Гетеборг (не Малме како што тврдат тие) во 1998 каде што загинале 63 македонски иселеници. Сѐ што се случило е затоа што ние имаме погрешни и негативни мисли и тоа го храни „егрегорот“ или духот, а иницијатори на настанот или оние кои го „повлекуваат чкрапалото“ се ОТО со своите окултни обичаи, зоофилија, поднесување жртва итн.
На сета болка и жалост, додека родителите сѐ уште не знаеја дали им се живи или мртви децата, дали и каде се испратени на негување, Трајковски и Камиловски ги оптеретуваат гледачите со ваквит теории на заговор непосредно по пожарот во кочанската дискотека. Без разлика на кој степен на објаснување се интерпретира настанот, односно причината и виновникот за пожарот (употреба на пиротехника, организацијата на настанот, немање соодветни лиценци за работа, долга традиција на криминал, корупција и поткупливост), недозволиво е да се „бомбардира“ јавноста со недокажливи глупости и дезинформации.
На пример, се тврди дека Кочани е дувло на СДСМ. Од последните 3 градоначалници кои се вкупно 16 години на власт, два се од редовите на ВМРО-ДПМНЕ: Ратко Димитровски (2009-2017) од ВМРО-ДПМНЕ, па Николчо Илијев (2017-2021) од СДСМ и Љупчо Папазов (2021-2025) од ВМРО-ДПМНЕ. Пожарот во Гетеборг во 1998 – потврдено е дека е подметнат, не е инцидент. Исто така, тврдењето дека ден на жалост во една држава за трагичен настан во друга држава, бил ретка работа, е неточно – за масакрот во Цетиње ден на жалост имаше во Србија, Република Српска, за нападот со нож во Пречко – Загреб, во Црна Гора имаше ден на жалост; за земјотресите во јужна Турција и Сирија, С. Македонија, Албанија, Косово, па дури и Бангладеш имаа ден на жалост. Зошто тогаш се шират дезинформации?
Од друга страна, како би се докажало дека „егрегорот“ или духот е причината за настанот? Како ќе се воспостави причинско-последичната врска, односно каузалноста, дека „негативниот набој во воздухот“ од Србија се пренел во Кочани?! Не може, бидејќи нема метод преку кој ова ќе се докаже. Просто е бесмислено причините за трагичниот настан да се објаснуваат со псевдонаука.
Дополнително, се поистоветуваат концепти кои немаат врска едни со други, на пр. сатанизам било исто што и марксизам и дарвинизам (!). Но, наспроти наведените мистични тврдења во поткастот – некои и со религиозна конотација, вреди да се напомене дека во моментите на бес и тага токму еден свештеник ја смири толпата луѓе што протестираа пред куќата на градоначалникот Папазов.
Конечно, со потпирањето исклучиво на мистиката како рамка за толкување на сите трагедии што се случиле – припишувањето на метафизички сили, како што е „негативното празнење“ – и поврзување на настани кои не се споиви, се одвлекува вниманието од реалните пропусти кои довеле до трагедијата. Уште полошо, со ваквото толкување на нештата се поигрува со маката на семејствата кои ги загубиле своите најмили и со големината на целата трагедија што ја снајде државата
Недозволиво и неумсено е тоа што Трајковски и Камиловски, во моменти на огромна тага со невидена леснотија пласираат некакво мистично толкување за причините и за виновникот (виновниците) за трагедијата во Кочани. Зачудува тоа што тие воопшто не гледаат корупција, системски пропусти, неправда, неказнивост и непостапување на институциите кои требале да реагираат навреме за да не дојде до несреќата.
