ПУБЛИКУМ Вистината на прво место
Ова видео, кое беше проследено до национална телевизија од страна на шефот на Вишо јавно обвинителство Мустафа Хајрулахи, отвора сериозни прашања за приватноста, незаконското следење и правата на новинарите во Македонија, велат од двете новинарски асоцијации
Здружението на новинарите на Македонија (ЗНМ) и Самостојниот синдикат на новинари и медиумски работници (ССНМ) преку соопштение изразуваат сериозна загриженост поради последното прекршување на основните права на новинарката Мирослава Симоновска, поради неовластеното снимање и дистрибуција на видео на кое таа наводно прима документ.
„Ова видео, кое беше проследено до национална телевизија од страна на шефот на Вишо јавно обвинителство Мустафа Хајрулахи, отвора сериозни прашања за приватноста, незаконското следење и правата на новинарите во Македонија“, велат од двете новинарски асоцијации.
Според нив, објавата на незаконски снимено видео од новинарката Симоновска ја нарушува нејзината приватност и нејзините основни права без разлика што објавениот видео материјал е со заштитени идентитети.
„Секој новинар има право слободно да се движи и да комуницира со граѓани без страв од незаконско следење или нарушување на приватноста. Оваа акција, за која веруваме дека е насочена кон застрашување и дискредитација на Мирослава Симоновска поради нејзината критичка работа, особено во однос на истражувањето на високиот јавен обвинител, претставува директен напад врз новинарската независност и претставува закана за сите професионални новинари“, велат од ЗНМ и од ССНМ.
Со ова, според двете граѓански организации, се создава опасност од автоцензура и се поткопува клучната улога на медиумите во контрола на власта. Оттаму велат дека ова не е изолиран случај бидејќи до ЗНМ и ССНМ утрово пристигнале и други пријави од новинарки кои сведочеле за суптилни притисоци за нивни теми поврзани со работата на Вишо јавно обвинителство.
Утринава, новинарката Мирослава Симоновска поднела кривична пријава до Основното јавно обвинителство Скопје за неовластено снимање од страна на службено лице.
Двете граѓански организации бараат од Основното јавно обвинителство итно и без одлагање да спроведе темелна истрага во врска со овој случај и ги повикува надлежните институции да ги заштитат правата и безбедноста на новинарите.
ЗНМ и ССНМ ќе ги известат меѓународните организации за поддршка на медиумите за ова скандалозно прекршување на правата на новинарите, кое може да има застрашувачки ефект врз слободата на медиумите во Македонија.
„Исто така, упатуваме порака до медиумите случаите каде има сомнително стекнати материјали да ги третираат со особено внимание и строго да ги почитуваат етичките стандарди“, велат од новинарските здруженија.
