Од инбокс до насловна страница: Медиумите дополнително го разгоруваат говорот на омраза

Вицепремиерот за добро владеење и транспарентност, Арбен Фетаи, на својот профил на Фејсбук објави дека добил смртна закана преку службен мејл. За помалку од половина ден, медиумите го пренесоа неговиот статус заедно со говор на омраза и тоа во насловите на своите текстови, пишува Порталб.мк.

Не е првпат медиумите без да бидат претпазливи и критички да ја анализираат, да пренесат изјава или објава од политичар, искористувајќи ја ситуацијата за да создадат сензационализам со што би си ја зголемиле посетеноста. Овој вид неквалитетно новинарство носи бројни штетни последици, а во случајов само ја засили и прошири пораката низ медиумскиот простор.

Веста најпрвин беше објавена на Алсат цитирајќи ја во целост заканувачката порака и тоа во насловот на текстот, не обезбедувајќи никаков контекст или пак критички поглед на настанот.

На агрегаторот Тајм.мк може да се видат повеќе текстови кои известуваат за настанот. Од нив, половина во насловот ја содржат истата заканувачка порака и со тоа уште повеќе го разгоруваат говор на омраза, особено во коментарите под веста.

Иако повеќето од нив ова го прават за да добијат кликови, ваквата пракса придонесува до тоа вакви пораки да станат доминантни во медиумската сфера и се зголемува ризикот од поддршка на негативни и опасни тенденции во општеството.

Говорот на омраза е сѐ почест феномен на интернетот, особено во коментарите на социјалните мрежи, а новинските портали наместо критички да известуваат за оваа појава, стануваат главни ширачи на ваквите пораки.

Пречестото повторување на истата порака ги продлабочува општествените поделби

Ова е втор случај на говор на омраза во последните недела дена кој праќа иста порака. Во првиот случај беше напишана на ѕидот од зградата пред Уставниот суд на Северна Македонија во Скопје. Иако графитот беше избришан по пријавувањето до Министерството за внатрешни работи од екипата на Порталб.мк, доколку се осврнеме на онлајн просторот, ситуацијата станува многу покомплексна.

Брзата реакција на институциите е позитивен пример за тоа како може да се делува против ширење на омраза во физичкиот простор, додека во виртуелниот просторот регулација скоро и да нема.

Во онлајн сферата, агресивното и штетно изразување на омраза и дезинформации често останува долго време неказнето, а механизмите за брзо отстранување се значително послаби. Она што недостасува се конкретни и ефективни стратегии и механизми за мониторирање и бришење штетни содржини на интернет. Закони и регулативи како „Актот за дигитални услуги“ можат да помогнат во регулирањето на оваа сфера, но исто така е потребно и активно учество на платформите за социјални медиуми и поширокото општество во борбата против омразата и дезинформациите онлајн.

Медиумите играат клучна улога во поларизирањето на општествата

Пречестото повторување на истата порака може да има негативни ефекти, особено кога станува збор за медиумско покривање, особено во време на емоционално обоени и политички поделени периоди. Кога општеството е поларизирано, медиумите често се доведени во ситуација да бираат страна или да претпочитаат еден наратив пред другиот, што може да ги засили веќе постоечките поделби.

Во вакви услови, медиумите треба да ја преземат одговорноста да ги балансираат наративите и да работат на намалување на поделбите, со тоа што ќе се фокусираат на конструктивен дијалог, проверка на факти и објективно информирање. Дополнително, важно е да се развијат механизми кои ќе ги заштитат медиумите од политичко или економско влијание, а ќе ги поттикнуваат новинарите да се посветат на етичко известување.

Медиумите не се тука само за да пренесуваат информации, тие дејствуваат како толкувачи и куратори, избирајќи и врамувајќи содржина за да и помогнат на публиката да разбере сложени прашања.

Говорот на омраза од медиумите директно и индиректно влијание на нашите животи

Говорот на омраза што доаѓа од медиумите има големо влијание на секојдневниот живот, бидејќи медиумите не само што ги формираат јавното мислење и ставови, туку и влијаат на општествените вредности, политики и идентичности. Кога медиумите шират говор на омраза или ги засилуваат поделбите, тоа може да има сериозни последици.

Ваквиот говор е штетен за општеството и може да се манифестира на различни начини, од отворени навреди и дискриминација до помалку видливи форми на омраза, како што се микроагресии и стереотипизација. Често може да има деструктивен ефект врз личностите, заедниците и целото општество.

Извор: МЕТА