Олимпијада 2024: 10.500 спортисти и 300.000 кондоми

Колку спортисти учествуваат на игрите?  

Околу 10.500 спортисти и спортистки од 206 нации ќе настапат на Олимписките игри. Во текот на 19 олимписки денови, од 26 јули до 11 август, тие ќе се борат за подиумот во една од 32 спортски дисциплини. Севкупно, ќе се поделат 329 златни медали.
Меѓу најголемите ѕвзеди на Игрите е американската гимнастичарка Симон Бајлс. Четирикратната олимписка првенка на Олимпијадата во Токио пред четири години се бореше со психички проблеми. Во атлетските дисциплини, кенискиот маратонец Елиуд Кипчоге ќе се обиде да стане првиот во историјата со трет златен медал во серија.
Очите на светот ќе бидат свртени и кон кошаркарскиот тим на САД кој, предводен од Леброн Џејмс, Стивен Кари и Кевин Дурант пристигна во Париз по уште еден златен медал.
Руските и белоруските спортист(к)и ќе можат да настапат на Игрите под неутрално знаме. Нивните национални химни нема да се исполнуваат, и не им е дозволено да покажуваат државни симболи. Причината е руската агресија врз Украина.

Има ли билети?

Организаторите очекуваат 15 милиони посетитетли. Но, на официјалната билетарница се уште можат да се купат влезници за многу натпреварувања. Со цена од 15 евра, најевтини се билетите за фудбалските натпревари. Влезниците за ватерполо или кајак, на пример, чинат 24 евра.
Заинтересираните за пливачките натпревари или гимнастиката, ќе мора да одвојат над 100 евра за билет. Најскапа е церемонијата на отворањето- за овој настан најевтината влезница чини 500 евра.

Каде ќе се одржат натпреварите?

Спортските натпревари ќе се одржат на 35 различни локации, но не сите се во Париз. Модерниот петобој и коњичките натпревари ќе се одржат пред дворецот Версај. Фудбал ќе се игра на стадиони низ целата земја. Ракомет во Лил. Сурферите ќе си ги мерат силите надвор од границите на Франција: на Тахити, најголемиот остров на Француска Полинезија.
Но, најголемиот дел од дисциплините ќе останат во срцето на француската престолнина. Особено впечатливи ќе бидат мечевите во одбојка на плажа- со поглед на Ајфеловата кула.

Церемонијата на отворањето нема да биде на стадион, како што е вообичаено, туку на 160 бродови со кои спортист(к)ите ќе патуваат по реката Сена низ Париз.
Останува да се одлучи дали натпреварите во слободно пливање и тријатлон ќе се организираат во реката Сена, како што беше првично планирано, поради нивото на загадување на реката кое варира, иако локалните власти тврдат дека состојбата е добра.

Кои се новите спортови?

На секои четири години нови спортови стануваат олимписки. На последните Игри во Токио дебитираа скејтбординг, спортско искачување и кошарка три-на-три.
Во Париз за првпат ќе гледаме „брејкинг“, познат и како брејкденс. Спортист(к)и играат на музички битови едни против други и импровизираат кореографија. Најдобрите ќе ги оценува жири. Во некои дисциплини има мали промени. Така на пример, за првпат ќе видиме кајак-крос.
Меѓу спортовите кои годинава ги нема се бејзбол, софтбол и карате. Нема да има ниту натпревар во 50-километарско брзо одење.

Колку кондоми ќе се поделат?

По забраната за интимизирање за време на Олимписките игри во Токио поради пандемијата на Ковид-19, на спортист(к)ите во Париз повторно им е дозволен секс. Во Олимпиското село, каде ќе бидат сместени 9.000 спортисти, на располагање ќе им бидат 300.000 кондоми. Алкохолот не е дозволен, па спортист(к)ите ќе мора да бараат утеха во 350 метри долгото бифе за храна.