Отровен воздух во сите делови на земјава, Скопје повторно меѓу шампионите во светот

Скопје, Велес, Куманово, Струмица, Кавадарци, Кичево, Тетово и Кочани и денеска се дават во ПМ честички. Загадувањето на воздухот и зимава руши рекорди, а главниот град повторно е на листата на десетте најзагадени во светот. Утрово, сите мерни станици на Државниот мониторинг за следење на квалитетот на воздухот, освен таа во Лазарополе, кои мерат ПМ 10 и ПМ 2,5 покажуваат високи или многу високи концентрации на честички.

Во последното деноноќие најзагадено било во Куманово, каде се измерени 188 микрограми на кубен метар ПМ 2,5 честички, што е речиси осум пати повисоко од максималната дозволена вредност и 214 микрограми ПМ 10, што е повеќе од четирипати над максималните вредности. Отровен воздух е измерен и во сите скопски општини. Мерната станица во Лисиче измерила 186 микрограми ПМ 2,5, а таа во Центар 107 микрограми ПМ 2,5 и 147 микрограми ПМ 10. Во Гази Баба концентрациите на ПМ 2,5 биле 101, а во Карпош 111 микрограми.

Скопје утрово е и на десеттото место на листата на IQAir, со вредност на индексот на загадување од 162, главно заради концентрациите на ПМ 2,5 честичките, кои се над 14 пати повисоки од препораките на Светската здравствена организација. Воздухот се оценува како нездрав, а препораките се да не се спортува надвор, да се носи маска, а во затворениот простор да работат прочистувачите на воздух.

Во Тетово воздухот во последните три дена бил загаден со ПМ 10 и до трипати над дозволените граници. Во Струмица се измерени 129 микрограми ПМ 10, во Кавадарци 159, во Кочани 100, а во Кичево 132 микрограми на кубен метар.

Шест од 22 мерни места на Државниот автоматски мониторниг втор месец по ред откако започна сезоната на греење и загаден воздух, не даваат целосни информации колкви се концентрациите на ПМ 10 или ПМ 2,5 во воздухот. Во Прилеп и во Берово не се мерат двете вредности, додека во Кочани, Велес, Битола и Ректорат по една. Од Министерството за животна средина информираа дека повеќето од инструментите во мерните места се исправни, но заради други технички проблеми не се испорачуваат мерења на загадувањето. Дел од дефектите се сервисираат, а за одржување на инструментите била спроведена постапка за набавка на резервни делови во висина од 3,5 милиони денари.

Загадениот воздух бил причина за еден од девет смртни случаи на деца до една година во 2021 година во С. Македонијаспоред меѓународното истражување на УНИЦЕФ во Европа и Централна Азија. Бебињата и малите деца се најизложени на ризик од смрт и лошо здравје како последица на подолготрајна изложеност на аерозагадување. Неодамна владата промовираше Планската програма за почист воздух 2024-2030 во која предвидува проекти за намалување на емисиите од домаќинствата, индустријата, транспортот, земјоделството и од јавните објекти.

Извор: МЕТА