Обраќањето на Претседателот на Република Северна Македонија, Стево Пендаровски, за време на посетата на Министерството за одбрана и на Генералштабот на Армијата, ви го пренесуваме во целост:

Oва е моја прва посета на Министерството за одбрана и на Генералштабот на Армијата. Оваа посета е и суштинска, но во исто време и симболична. Суштинска е бидејќи како Претседател и Врховен командант на вооружените сили имам уставни и законски ингеренции во областа на одбраната, истовремено е и симболична, бидејки првите институции кои најдиректно ќе станат дел од најмоќниот воено-политички сојуз на денешницата се токму Министерството за одбрана и Генералштабот на Армијата.

Со министерката за одбрана и началникот на Генералштабот на средбите предмалку разговаравме за клучните чекори кои следат за да бидеме целосно подготвени за нашето членство во НАТО. Како Претседател, тесно ќе соработувам со двете институции. Секогаш ќе сакам да го слушнам мислењето на Министерството за одбрана и на Генералштабот за проблемите и предизвиците со кои се соочуваат и ќе се вклучам во изнаоѓањето на најдобрите решенија што заедно ќе не водат напред.

Почитувани присутни,

Република Северна Македонија направи историски чекори кои ни ја донесоа поканата за членство во НАТО. Со тоа се остварува една од нашите врвни стратешки цели. Како држава треба да сме подготвени за оваа голема чест и голема одговорност во исто време. Како Претседател ќе инсистирам на врвна подготвеност и професионалност на институциите во оваа област.

Ме радува фактот што во последната година буџетот на ресорот Одбрана почна да расте и јас ја охрабрувам Владата да продолжи со овој тренд, со уште посилно темпо. Како одговорна НАТО членка ние ќе мораме да дојдеме до стандардот на издвојување од 2 % за одбраната од БДП до 2024 година.

Во Армијата мора да се вложува преку спроведување на темелни реформи во безбедносниот сектор, да продолжиме да градиме професионална, технички современа НАТО армија што ќе биде подготвена не само да ја брани територијата на Северна Македонија, туку и ќе продолжи активно да придонесува за заштитата и за изградбата на слободни и демократски општества и надвор од нашата земја. Вложувањето во Армијата подразбира и вложување во професионалните стандарди, како и во животниот стандард на војникот што мора да биде наш приоритет.

Уште во моето инаугуративно обраќање најавив дека сите промоции во делокругот на Армијата ќе бидат во согласност со законите и во согласност со професионалните референци на кандидатите. Мораме да ги имаме најдобрите професионалци во оваа област за што поскоро да го оствариме членството во НАТО.

Затоа ги охрабрувам припадниците на Армијата, офицерите, подофицерите и војниците, да работат на свое усовршување, а обврска на лидерствата на двете институции е тоа да им го овозможат. Во оваа прилика сакам да истакнам дека очекувам од сите релевантни политички фактори, сите институции на власта, вклучително и опозицијата, да се вклучат во поддршка на овој потфат, да го покажеме на дело нашето единство, околу клучните стратешки цели на Република Северна Македонија, што е во интерес на сите граѓани на нашата заедничка држава.