По САД, и Британија денеска воведе санкции против Милорад Додик

Британија денеска објави дека ги санкционирала членот на Претседателството на Босна и Херцеговина од Република Српска (РС) Милорад Додик и претседателката на тој ентитет Жељкa Цвијановиќ, поради обидите да го нарушат легитимитетот и функционалноста на државата БиХ, јавува Радио Слободна Европа на македонски јазик.

Британските санкции вклучуваат забрана за патување и замрзнување на имотот на Додик и Цвијановиќ, при што тие се први во рамки на британскиот режим на санкции кон БиХ, соопшти британската влада, нагласувајќи дека „тоа не се санкции против Република Српска или нејзините граѓани“.

Во одлуката на британските власти се наведува дека Додик и Цвијаноиќ „охрабрени од руското поткопување на меѓународниот систем“ ги искористиле своите позиции на моќ за да извршат де факто отцепување на Република Српска, еден од двата ентитета на Босна и Херцеговина, што е директно спротивно на државниот устав.

Британската министерка за надворешни работи Лиз Трас рече дека, работејќи во координација со Соединетите Американски Држави и други партнери истомисленици, се надева дека британските санкции ќе ги охрабрат другите земји да применат слични рестриктивни мерки „повикувајќи ги политичарите на одговорност за нивното дестабилизирачко и опасно однесување“.

Во својата реакција, Милорад Додик рече дека му било “драго” што е предмет на интерес на британската влада и за него тоа било голем “успех”. Тој ги нарече британските тврдења како лаги, јавува Ал Џазеира Балканс. Додик изрече многу навреди кон британскиот амбасадор во БиХ, но и на сметка на опозициони политичари од Република Српска и на други политичари од Босна.

Прочитајте повеќе

Земјотрес со јачина од 5,4 степени во Црна Гора, почувствуван и во Македонија и регионот

Од црногорскиот завод подоцна информираа дека по главниот земјотрес, следувале уште 30 помали Земјотрес со …