ПУБЛИКУМ Вистината на прво место
Пет дена по трагедијата во Кочани, Македонија тагува и се збогува со 59 прерано згаснати млади животи. По првичната тага и болка, граѓаните очекуваат правда, коригирање на неправилностите во системот и искоренување на корупцијата којашто го нагризува општеството.
„Кочани е нашата совест која што повикува на дејствување. Кочани е нашиот непребол кој налага реакција. Кочани е катарза на трулиот систем и ендемската корупција вкоренети длабоко низ институциите кои што ги уништуваат човечките животи“, вели вицепремиерот и министер за животна средина, Изет Меџити. Владата најавува правда и одговорност од сите, без разлика на партиската или етичката припадност. Обвинителството бара обединетост во земјата.
„Наша заеднички цел е да ги казниме сите одговорни и да обезбедиме дека ваква трагедија никогаш повеќе да се повтори“, вели државниот јавен обвинител, Љупчо Коцевски.
Многу болка – малку правдина
Кочани, „Беса транс“, „Модуларна болница во Тетово“, „Ласкарци“ – премногу тешки трагедии со преголем број жртви се случија за една мала земја како што е Северна Македонија „Многу болка и семејства обвиени во црно и плач, а многу малку правдина за жртвите“, потсетува вицепремиерот Меџити.
Како претставник на Владата тој порачува дека горчливата лекција од Кочани е научена. „Пораката е примена: државата нема да седи со скрстени раце и нема да дозволи правдата да заталка и да се девалвира низ институционалните лавиринти изградени да ги штитат токму недопирливите“, порачува тој во објава на социјалните мрежи.
Борба за подобра Македонија, според вицепремиерот, ќе има смисла само тогаш кога оние кон кои системот бил неправеден ќе почувствуваат дека правдата, сепак, не е заробена од мафијата која ја контролира државата, како што за жал тоа било случај со години наназад, и дека нивните повици за правда ќе наидат на одговори и реакција.
„Државата ќе дејствува! Одговорност ќе има! Правда ќе има: за Кочани, за ‘Беса транс’, за Тетовската болница, за Ласкарци, за сите трагедии предизвикани од корупција и неказнивост, а чии што последици се човечки животи“, дециден е Меџити.
„Или Македонија или мафијата“
Слични пораки испрати и премиерот Христијан Мицкоски во гостување на Сител Телевизија. Тој рече дека ќе се отворат сите претходни случаи и за модуларната болница и за Ласкарци истакнувајќи дека ќе се оди до крај и ќе има одговор што точно се случувало.
„Сите овие случаи одблиску ќе ги следам. Знам во која фаза се и очекувам обвинителството многу јасно да ја прошири истрагата и да го идентификува не само возачот на автобусот или управителот на правното лице, туку да видиме во кој испитен центар кажале дека тој технички е исправен, кој ја дал за тој испитен центар функционира така што функционира“, вели Мицкоски.
Зошто во модуларната болница е променето министерството од едно во друго кога е правена јавната набавка, зошто кабелот е виновен, кој го направил проектот и дали можеби недостасуваат некои елементи – се исто така прашања на коишто премиерот најавува дека ќе се бараат одговори.
„За сето ова ќе има одговор, ќе има разврска. Нема ништо да оставиме. Тргнавме, нема сега запирање, одиме до крај. Или тие или ние. Во животот постојат две работи, или тој или ти. Не може двајцата да опстанат, или ние ќе опстанеме, Македонија и граѓаните од една страна, или мафијашите. Нема место за двајцата повеќе“, дециден е Мицкоски.
Правдата мора да биде задоволена
Оваа трагедија има димензии на национална катастрофа, вели државниот јавен обвинител, Љупчо Коцевски. Во интервју за белградска „Политика“, Коцевски вели дека предолго се толерираше непочитувањето на законот – сега сите бараат правда и правдата мора да биде задоволена.
Според него, сите докази за „Пулс“ упатуваат на кривично дело – тешки дела против општата безбедност, за што е предвидена казна затвор до 20 години.
„Доказите кои секој ден ги собираме укажуваат на тоа дека коренот всушност е една општа ерозија на системот, култура на непочитување на законот и правилата, но и длабока системска корупција. Обвинителството, за жал, не е орган на превенција, туку на репресија. Дали и како можел да се спречи ваков епилог? Би рекол, можеби. Но, сега е на нас да се соочиме со последиците, да ги казниме одговорните за оваа катастрофа и да спречиме да се повтори ваква трагедија“, истакнува Коцевски.
Според него, заедничко за трагичните настани со кои се соочи земјата изминатите години е тоа што покрај директната причина за катастрофата, често постои и дополнителен причинител во вид на непочитување на законот и системска корупција, што, како што вели, значително ги зголемува катастрофалните последици.
„Но, она што е во овој случај многу болно е тоа што последиците се разочарувачки. Кочани е мал град на истокот на земјата. Во оваа трагедија, во само една ноќ, изгубивме скоро цела генерација млади луѓе од тоа мало место и од социолошки аспект би рекол дека ова е колективна трагедија која нашиот народ тешко ја поднесува“, вели републичкиот обвинител.
До овој момент, за трагедијата се осомничени 28 лица, од кои тројца се во болница, 18 се притворени во предистражна постапка, а против седум полициски службеници се води истрага и тие се исто така во притвор. Доказите се собираат во изјави и во материјален облик, но и во форма на експертизи и стручни мислења од одредени области.
Се истражува давање и примање на мито, незаконитости во набавката на пиротехнички средства, како и неколку други кривични дела. Во несреќата која се случи во неделата (16.03) во дискотеката „Пулс“ во Кочани загинаа 59, а повредени над 190 лица.
