ПУБЛИКУМ Вистината на прво место
Државното и партиското раководство во Пекинг не реагираше на ултиматумот на Доналд Трамп и ги задржа контрацарините од 34 отсто за американски стоки. Ова значи дека ескалацијата во трговскиот спор меѓу САД и Кина продолжува.
Од полноќ по кинеско време, за кинеските стоки испорачани во САД важат 104 отсто дополнителни царини, покрај веќе постоечките.
Се очекува Кина во наредните денови да воведе дополнителни царини и трговски ограничувања за американските производи и американските компании. Се шпекулира и дека може да дојде до прекин на соработката за спречување на кризата со фентанил во САД.
Кинеските државни медиуми во вечерните часови вчера (8.04) објавија дека САД се земја проколната од сопствената мегаломанија. Весникот „Чајна Дејли“ пишува дека контрамерките на Кина не се конфронтација, туку неопходен одговор на деспотската трговска политика на САД.
Министерството за надворешни работи и Министерството за трговија во Пекинг уште еднаш остро ги осудија вчерашните постапки на Трамп. Портпаролот на кинеското МНР изјави дека со САД ќе се води царинска и трговска војна до крај.
Во екот на царинскиот спор, Кина се прикажува себеси и како чувар на правичноста во меѓународната трговија. По телефонскиот разговор меѓу премиерот Ли Кијанг и претседателката на Европската Комисија, Урсула фон дер Лајен, е издадено соопштение во кое Пекинг вели дека Кина и ЕУ се посветени на слободна светска трговија заснована на вредности. Соопштението на Европската Унија се чита малку поинаку. Според него, Фон дер Лајен ја повикала Кина да работи на изнаоѓање решение со Трамп преку преговори.
